499. De sancto Zenone.

Ad Laudes.
1. Praesulis sancti redeunt colenda
Festa Zenonis, Dominum sequentis,
Qui diem nobis celebrem sacravit
Fine beato.

2. Magnus excelsi fuerat sacerdos,
Praedicans gentes bene transmarinas,
Inde Veronam Deus hunc ad urbem
Mittere curat.

3. Qua Deum multum populum lucratus
Instruit verbis, solidavit actis,
In Deo tandem patiendo mortem
Vivit in aevum.
4. Nunc in aeternum meritis coruscat
Clarus et mundo manifestus omni,
Qui Deo soli studuit placere
Corpore vivens.
5. Pastor aeterno radians triumpho,
Servulos audi tibi supplicantes,
Praemium justis, veniam deposce
Crimine lapsis.
6. Quo Dei magna miseratione
Ordinem coeli decimum replentes
Ipsius vultum videamus omni
Tempore saecli.