MEMBRUM V.

Utrum Angeli omnia vel quaedam loquantur ?

Quinto quaeritur, Utrum Angeli omnia, vel quaedam loquantur?

Et videtur, quod, non omnia: de quibusdam enim cognitionem habent per revelationem verbi: et illa cognitio non est omnibus communis: per revelationem enim talem quaedam scit unus, quae non scit alius: ergo de illis non est omnibus communis locutio.

Sed contra hoc est, quod in hominibus homo naturali interpretatione potest loqui et de revelatis per gratiam, et de scitis per naturam: cum ergo Angeli non sint inferioris potestatis quam homines, omnes Angeli ad invicem poterant loqui et de revelatis per verbum, et de omnibus aliis conceptibus naturali interpretatione.

Ad hoc dicunt quidam, quod tribus modis loquuntur Angeli, scilicet facto, verbo spirituali, et resultatione ejus quod est in uno in alterum, sicut paulo ante dictum est de duobus speculis. Facto, quando aliquis facit aliquid coram eo, quo facto ille scit quod ante nesciebat, ex facto ipso notitiam, accipiens. Verbo spirituali, sicut per speciem rei . de qua loquitur voluntate manifestandi illud lumen intelligentiae dirigit, et innuit alterum ipsum: sicut ante dictum est, quod Angeli loquuntur. Et his duobus modis dicunt, quod omnes omnibus, et de omnibus loquuntur, tam de gratuitis, quam de naturalibus. Tertio modo, quando unus ostendit alteri, quod in ipso resultat de theophaniis divinis: sicut unum speculum ostendit alteri quod est in ipso, quando sibi opponitur secundum processum luminis divini: et sic non omnes omnibus nec de omnibus loquuntur: multa enim resultant in superioribus, quae non resultant in inferioribus de illuminationibus divinis, de quibus inferiores non possunt loqui superioribus, cum locutio nihil aliud sit quam interpretatio ejus quod est in corde vel in intellectu. Et hoc videtur mihi bene et satis rationabiliter dictum.