COMMENTARIUS.

(b) Ad propositum tria praedicta, etc. Negat hos actus esse partes poenitentiae primo et secundo modo hic sumptae, cujus ratio nota est ex littera. Sed advertendum est actum vindicandi peccati posse dupliciter considerari: uno modo, quando poenitentia imperat actum nolitionis peccati, quo causatur proxime ipsa poena seu tristitia, et sic hic intelligitur non integrare poenitentiam, id est, poenae tenentiam per actum elicitum voluntatis. Alio modo sumitur ut est nolitio peccati, seu detestatio perfecta ex motivo vindicationis, ut imperatur a charitate, quia sic habet se ut causa proxima poenae. Hoc modo integrat poenitentiam tertio modo per modum contritionis ( ut esse potest ex dictis supra quaest. 2. dist. 14.) prout in hac divisione sumitur poenitentia. Tertio dicit tres illos actus esse partes integrantes poenitentiae tertio modo, ut sumitur pro causa proxima, ad quam sequitur poena ipsa. Et quarto dicit poenas concomitantes ipsos actus integrare unam punitionem . totalem, quae correspondet peccato secundum medium justitiae vindicativae, sicut restitutiones partiales faciunt unam totalem, ad quam restituens obligatur ex triplici damno illato, aut triplici contractu ; justitia enim vindicativa respicit medium aequalitatis secundum rectam rationem voluntariae punitionis correspondentis peccato. Hic nihil offertur dicendum praeter ea, quae alias dicta sunt ex hac integritate, qua actus conveniunt in unam poenitentiam, vocantur quasi materia a Conciliis supra citatis.