ARTICULUS III.

De hierarchia Princip aluum, Archangelorum, et Angelorum .''

Deinde, Quaeritur de hierarchia horum trium in communi, scilicet quis sit actus proprius istius hierarchiae?

Et dicitur communiter, converti super hominem, et disponere ea quae pertinent ad salutem hominis.

1. Sed contra hoc esse videtur, quod etiam Virtutum, quarum est exhibere miracula, et Potestatum quarum est arcere nocentia, est conversio super homines: et illi sunt de media hierarchia: non ergo est proprium hoc inferioris hierarchiae, sed commune cum secunda.

2. Adhuc, Dionysius in Caelesti hierarchia: " Excellentissimam quidem enim dispositionem tamquam ipsi occulto primitus ordinate proximante clam formans aestimandum ordinare secundam. Secundam vero quae completur a sanctis Dominationibus, et Virtutibus, et Potestatibus, praeesse illi quae completur a Principatibus, Archangelis, et Angelis, et illi per consequentia praecipere, et illam ut inferiorem nobis praeesse et praecipere . "

3. Adhuc, Dionysius, ibidem, " Prima quidem hierarchia formatur manifestius: ea vero quae post eam est, occultius: Principatuum vero et Archangelorum et Angelorum manifestativam dispositionem humanis hierarchiis per consequentia praecipere, ut sit per ordinem, ascensus in Deum et conversio ei communicatio et unitas. " Ex hoc accipitur, quod suprema hierarchia circa occultissimum est, et media circa manifestius, et intima circa manifestissimum. ei hoc videtur esse contra verba Dionysii in praehabitis posita, quod scilicet prima videt manifestatione prima, et secunda manifestatione secunda, et tertia manifestatione tertia.

4. Adhuc quaeritur, Quae differentia sit inter ascensionem et conversionem in Deum, et communicationem et unionem, de quibus Dionysius fecit mentionem ?

Solutio. Dicendum, quod actus isti hierarchiae proprius est illuminationum perceptio ad dispositionem salutis pertinentium, ut dicit Dionysius.

Ad primum ergo dicendum, quod actus Virtutum et Potestatum primus est ad generalem mundi gubernationem: quia tamen hoc principaliter est ad salutem hominis, propter quem omnia facta sunt, propter hoc actus consequens ipsorum, est conversio super homines, ut scilicet miracula faciant, ut homines facilius convertantur ad fidem, et potestates arceant contrarias, ne salutem hominis impediant: sed isti hierarchiae est proprium primo et principali actu uniuscujusque ordinis positi in ea.

Ad aliud dicendum, quod occultam dicitur duobus modis, simpliciter scilicet sive in se, et quoad, nos. Simpliciter occultum est, quod maxime est elevatum super cognitionem omnis creaturae: et hoc est Deus. Et ex hoc occultissimo quidem clam formatur prima hierarchia. Occultum quoad nos est, quod ex nostro quod ei circumponitur, a vigore proprii luminis distans occultatur. Et hoc modo occultissimum est in tertia hierarchia. Et ideo non est contrarium ei quod dicit Dionysius cum aequivoce sumatur occultum : et simpliciter prima manifesta-

tione est in primi hierarchia, et secunda manifestatione in secunda, et tertia manifestatione in tertia.

Et hoc est quod dicit Dionysius in argumento sequenti.

Ad ultimum dicendum, quod inter illa quatuor differentia est: quia prima duo dicunt motum in Deum. Ascensio qui- dem dicit motum in Deum per rationem termini a quo: conversio autem eumdem motum per rationem termini ad quem. Alia duo dicunt effectum ejusdem motus, et communicatio dicit effectum ejusdem motus prout est in fieri: unio autem eumdem dicit, prout est in perfecto esse.