ARTICULUS II.

Qualiter his actibus utuntur inter se, et qualiter ad animas hominum ?

Deinde quaeritur, Qualiter his utuntur inter se, et qualiter ad animas hominum ?

1. Objiciunt enim quidam, quod quorum est una natura communis, horum est illuminatio per unum illuminatorem: Angelorum omnium est una natura intellectualis communis, scilicet deiformis intellectus: ergo illuminatio omnium Angelorum est per unum illuminatorem: non ergo utuntur his actibus, ita quod unus illuminet, purget, et perficiat alium: sed omnes illuminantur, purgantur, et perficiuntur a Deo

2, Adhuc, Ad animas hominum videtur non posse uti his actibus: animae enim hominum non purgantur, nisi a peccato vel sequela peccati: peccatum autem et sequela peccati non remittuntur nisi a Deo per gratiam: gratia autem non potest esse ab Angelo. Marc, ii, 7: Quis potest dimittere peccata, nisi solus Deus .

Solutio. Dicendum, quod his actibus utuntur Angeli inter se, ita quod unus alium purgat, illuminat,, et perficit. Qualiter autem hoc fiat, sufficienter determinatum est in quaestione de locutione Angelorum, et in quaestione de distinctione hierarchiarum secundum triplicem proportionem ad illuminationes: quae, sicut dicit Dionysius, participantur ab Angelis manifestatione prima, secunda, et tertia.

Ad objectum dicendum, quod licet Angelorum una sit natura intellectualis, scilicet deiformis intellectus, tamen non est in ipso simplicitas essentiae una, sed triformis secundum tres hierarchias: et ideo analogiam non habent ad illuminatorem unum, sed ad diversos: prima enim hierarchia illuminatur a Deo, secunda et tertia ab Angelo. Secunda enim analogiam habet ad illuminatio- nem proportionatam Angelo. Tertia vero ad illuminationem proportionatam et ecclesiasticae hierarchiae et animabus hominum.

Ad id quod quaeritur, Quaeliter utantur his actibus ad animas hominum ?

Dicendum, quod sufficientissime determinatum est in quaestione de locutionibus Angelorum, ubi quaeritur, qualiter Angeli loquantur animalibus non assumpto corpore, visione scilicet sensibili, et imaginaria, et intellectuali: his enim tribus modis suas illuminationes transfundunt in animas hominum: nec propter hoc sunt immissores, nec boni, nec mali, sicut ibi sufficienter disputatum et determinatum est.

Ad objectum dicendum, quod licet animae hominum analogiam non habeant ad illuminationes divinas in prima manifestatione, tamen quia anima hominis ad imaginem Dei facta est, et est substantia rationalis et intellectualis, analogiam habet perspicacitatis intelligentiae ad illuminationem factam per Angelum, prout est in manifestatione tertia.