QUAESTIO UNICA

CONTINENS QUINQUE CONNEXAS.

Utrum Deus habeat notitiam determinatam omnium, quantum ad omnes conditiones existentiae ?

Alensis 1. p. q. 23. m 2 art. 4. et m. 4. per totum. D. Bonav. hic a. 2. q. 3. D. Thom. 1. p. q. 14. art. 9. et 13. ubi ejus exposit. Richard. 1. d. 38. q. 2. et 3. et hic art. 1. q. 1. Capreol. 1. d. 36. q. 1 . art. 2. Gabe 1. d. 38. q. 1. a. 2. Suarez opusc. de scientia Dei, et 1. p. tr.1. lib. 3. c. 3. 4. 5. Vasquez 1. p. d. 64. 65. Mayr. d. 34. et 39.

In secunda parte distinctionis tractat Magister de infallibilitate scientiae divinae, et distinctione trigesima nona tractat de immutabili tate scientiae divinae. Quantum igitur ad istam materiam, prout scientia divina respicit simpliciter existentias rerum, quaero quinque.

Primo, utrum Deus habeat notitiam determinatam omnium, quantum ad omnes conditiones existentiae?

Secundo, utrum habeat certam notitiam et infallibilem omnium, quantum ad omnes conditiones existentiae.

Tertio, an habeat immutabilem notitiam de omnibus, quantum ad omnem conditionem existentiae ?

Quarto, an necessario sciat omnem conditionem existentiae omnium ?

Et quinto, utrum cum determinatione et certitudine scientiae suae, possint stare aliqua contingentia ex parte rerum in existentia ; et haec simul quaeri possunt, quia per eamdem simul solvuntur.