MEMBRUM I.

Utrum anima et maxime hominis sit simplex, vel composita ?''

Ad primum objicitur sic:

1. Augustinus in libro de Spiritu et anima: " Si anima dicitur habere partes, ratione potius similitudinis quam veritate compositionis intelligendum est. Simplex enim substantia est, nec aliud nec minus est ratio in substantia quam ipsa anima " Ex hoc accipitur, quod anima non est composita, sed simplex in substantia,

2. Adhuc, Si anima est composita quantitate compositionis: tunc in majori corpore esset major, et in minori minor: quod aperte est falsum: ergo videtur, quod anima est simplex.

3. Adhuc, Sicut, in antehabitis determinatum est, Augustinus dicit in libro de Spiritu et anima, quod " anima est omnia sua, sicut Deus est omnia sua: " et hoc non potest esse nisi sit simplex et in fine simplicitatis: ergo anima non est composita, sed simplex.

4, Adhuc, Ibidem dicit Augustinus , quod " anima videt in oculo, audit in aure, et sic de aliis potentiis: ita quod in singulis tota operatur et tota est. " Ergo videtur, quod simplex sit: quia aliter in qualibet non posset esse tota, sed esset in una potentia secundum unam partem, et in alia potentia secundum aliam partem.

5. Adhuc, Ibidem, Augustinus: " Anima in quibusdam suis motibus vel acti- bus tota simul adest. Tota videt, et tota visorum meminit. Tota audit, et tota sonorum reminiscitur. Tota odorat, et tota odores recolit. Tota per linguam et palatum sapores sentit et discernit. Tota tangit dura et mollia. Tota simul approbat vel improbat. " Et paulo post: " Tota est visus, tota est auditus, tota meminit: et cum tota meminit, tota est memoria. Cum tota vult, tota est voluntas. Gom tota cogitat, tota est cogitatio. Cum tota diligit, tota est dilectio. "

6. Adhuc, Infra: " Anima est substantia spiritualis simplex, indissolubilis . " Ergo videtur, quod simplex sit, nullam habens compositionem penitus.

Contra:

Gregorius Nyssenus in libro de Homine: " Anima est substantia ut subjectum quod substat accidentibus: substat enim vitiis vel virtutibus et passionibus, et mutatur secundum illas . " Sed omne quod substat habitibus et passionibus et mutatur secundum illa, est substantia composita ex quale quid et hoc aliquid. Ergo anima est substantia essentialiter composita ex quale quid et hoc aliquid.

Solutio. Dicendum, quod anima et maxime hominis, quae arte et providentia regit corpus ut nauta navim, composita est ex hoc aliquid. Et nisi ita dicatur, dicit Gregorius, quod sequitur quod corpore destructo destruitur anima. Talis enim substantia comparatur ad corpus ut motor, qui arte et intentione movet: quae non potest esse forma simplex: quia forma simplex movere non potest, nisi motu generantis, hoc est, quod generans inducit ei formam per generationem: et generata in forma naturali ex aequo participant consequentia naturalem formam, quae sunt motus et locus. Ideo nihil talium movetur in loco suo: sed sicut quiescunt a certa forma in esse quod est actus illius formae, ita quiescunt in locis consequentibus illam formam, sicut ignis sursum, et terra deorsum. Et propter hoc etiam locus unum de principiis corporis mobilis esse ponitur in IV Physicorum. In animatis autem quae moventur in locis suis, necesse est esse motorem compositum ad minus ex motivo cognitivo, et ex moto appetitivo: qui appetitus motus movet corpus, et extendit organa ejus, quae sunt partes ejus, ad acquirendum id quod appetitur: et sic motivum cognitivum tunc in sensibili anima vel est phantasia vel aestimativa. In rationali autem quando secundum rationem movetur, est intellectus practicus: quia non fit motus nisi fiat nuntium de motu: nuntium autem non fit ad animam, nisi per phantasiam vel intellectum. Et hujus causa est quod dicit Augustinus super Genesim ad litteram, et Aristoteles in III de Anima, quod omnis anima movetur visis. Visa autem non sunt nisi secundum sensibilem partem vel intellectivam: vegetabilia enim non moventur nisi a natura motu nutrimenti, augmenti, et generativo. Cum ergo anima rationalis moveatur, de necessitate exigitur, quod sit composita ex movente cognitivo et ex moto appetitivo: quod ulterius sic motum movet corpus et organum: et sic composita est de necessitate ex quod est et quo est: quod est autem est id quod substat et supponitur in omni natura: quo est, est id quod nulli potest substare, sed sibi substat quod est, Et hoc est quod dicit Boetius in principio de Hebdomadibus, et unum est de principiis ibi suppositis: et dicit sic, " Quod est habet aliquid praeter id quod ipsum est: quo est vero nulli potest esse subjectum. " His ita notatis, facile est respondere

objectis: omnes enim auctoritates inductae loquuntur de simplicitate illa quae est exclusio compositionis quantitativae et corporalis, et nihil loquuntur de exclusione compositionis essentialis, quae est ex quod est et quo est: quam necesse est in omni eo esse quod est creatum: et non excluditur nisi ab uno solo primo, in quo est idem esse quod est, ut probant Philosophi omnes generaliter et concorditer de eo quod simpliciter est, et absolute necesse est esse, quod est primum principium esse, quod facit debere esse in omni eo quod. est.

Ad omnes auctoritates inductas patet solutio per praedicta.

Id quod in contrarium est, concedendum est: quia hoc procedit.