MEMBRUM II.

In quo sit fomes, utrum in corpore, vel in anima, vel in utroque ?

Secundo quaeritur, Utrum fomes sit in anima, vel in corpore, vel in utroque ?

Et videtur, quod in carne sola. Inter paenas enim causatas ex originali peccato ponuntur concupiscentia et ignorantia. Videtur ergo, quod sicut ignorantia refertur ad animam, ita concupiscentia referatur ad carnem.

Contra:

1. Augustinus in libro de Spiritu et anima dicit: " Concupiscentia quasi generale malum complexus est Dominus cum dixit: Non concupisces : neque enim unum aliquod peccatum est quod non concupiscendo committatur. " Videtur ergo, quod fomes sit in anima: quia concupiscentia est in anima.

2. Adhuc, Augustinus in libro LXXXIII Quaestionum: " Turpis est affectio, quam animus inferior sectatur, quae magis proprie dicitur concupiscentia. " Videtur ergo, quod sit in anima: quia concupiscentia est in anima.

Solutio. Dicendum, quod in veritate fomes, sive libido, sive concupiscentia, in anima sunt, et propriae passiones et actiones animae, sed dicuntur in carne esse, quia delectabilia sunt in carne: et ad membra corporalia se extendunt, quae habent quasi arma iniquitatis. Ad

Roman, vi, 13: Ne exhibeatis membra vestra arma iniquitatis peccato.

Et sic patet solutio, et etiam auctoritates inductae.