Scholium.

Secundo, Ecclesia propter specialem applicationem personarum ad cultum divinum, reddidit incapaces matrimonii Religiosos, de quo dist. 38. et suscipientes sacram Ordinem, de quo dist. 37. Tertio, propter duo crimina, reddit incapaces, fidelem cum infideli, et adulterum machinantem in mortem conjugis, vel dantem fidem adulterae. De primo, supra dist. 39. de secundo, d. 35. Triplicia ergo in genere sunt impedimenta Ecclesiae, scilicet ob propinquitatem, ex qua sunt, cognatio carnalis, legalis, spiritualis affinitas, publica honestas ; ob applicationem ad Dei cultum specialiter, ex qua est voti solemnis et sacri Ordinis impedimentum; et ob duo illa crimina.

Per (i) applicationem autem specialem ad cultum divinum, Ecclesia illegitimavit eum, qui solemniter vovit continentiam, et eum qui suscepit Ordinem sacrum. De primo dictum est distinct. 38. de secundo distinct. 37. illud autem de voto solemni, si tamen ibi fiat traditio potestatis corporis ad castitatem servandam ipsi Ecclesiae vel Praelato, in cujus manu vovet, et per hoc non habet potestatem sui corporis ad actum conjugalem ; tunc potest reduci istud impedimentum ad naturam contractus, sicut illud de alligato ad aliud matrimonium.

Si autem tale votum non tollit isti quin habet potestatem sui corporis, tunc ex statuto et potestate Ecclesiae est illegitimatio et irritatio, non tantum quia se tradit Ecclesiae ad talem actum, sed quia Christus vocando Joannem a nuptiis praetulit votum continentiae vinculo conjugali; et ideo Ecclesia illum, qui est in gradu superiori, juste illegitimavit ad accipiendum gradum inferiorem, sive ad apostatandum.

Tandem propter enormitatem criminis tantummodo duplicis, illegitimavit juste, propter scilicet enormitatem infidelitatis illegitimavit fidelem non simpliciter, sed respectu infidelis, et e converso ad matrimonium contrahendum ; et de hoc dictum est dist. 39. Aliud crimen enorme est adulterium cum machinatione in mortem legitimi conjugis, et de isto impedimento dictum est dist. 35. vel etiam cum fidei datione de contrahendo post mortem legitimi conjugis. Sic ergo in genere ex statuto Ecclesiae sunt personae illegitimae ex duplici crimine, ex applicatione ad cultum Dei, et ex propinquitate consanguinitatis, ex vinculo affinitatis et publicae honestatis, et ex cognatione spirituali et legali, et haec impedimenta tanguntur in his versibus :