ARTICULUS IV. In quo differat inanis gloria a superbia?

Quarto quaeritur, In quo differat inanis gloria a superbia ?

Videtur enim idem peccatum esse cum superbia.

1. Gregorius in Moralibus: " Inanis gloria suggerit se praeesse, ut pluribus praesit, non prosit. " Hoc idem suggerit superbia. Ergo inanis gloria et superbia sunt idem.

2. Adhuc, Augustinus super Joannem: " Ambitio humanae laudis appetit de se aestimari quod in se non habet, et super alios se efferre. " Hoc idem appetit superbia. Ergo superbia et inanis gloria sunt idem peccatum. Contra:

Augustino in libro V de Civitate Dei: " Quisquis sine cupiditate gloriae, qua veretur homo bene judicantibus displicere, dominari atque imperare desiderat, etiam per apertissima scelera quaerit plerumque obtinere quod diligit. Proinde qui gloriam concupiscit, aut vera via utitur, aut certe dolis aut fallaciis contendit, volens bonus videri esse, quod non est . " Ex hoc accipitur, quod superbia quaerit praeesse: inanis autem gloria excellere in laude: et haec duo sunt diversa: ergo superbia et inanis gloria sunt diversa, et non idem peccatum. Quod concedendum est:. licet diversa sint, tamen frequenter sunt conjuncta I quia inanis gloria est prima filia superbiae, ut dicit Gregorius in moralibus.

Solutio. Dicendum ad primum, quod Gregorius dicit hoc, non quod inanis gloria suggerat praeesse, sed quia superbia praeesse suggerit: et hoc nititur per inanem gloriam obtinere: et propter hoc, quod sic conjunctae sunt, una videtur esse alia, cum tamen diversa sint.

Ad aliud dicendum, quod per dictum Augustini non probatur, quod sint idem, sed quod sunt peccata conjuncta: et unum per aliud nititur obtinere quod desiderat, ut paulo ante diximus.

Id quod in contrarium objicitur, concedendum est et procedit. Tamen per dictum illud quod intendit Augustinus dicere, nec probatur quod idem, nec diversa sint, sed quod superbia diversis viis nititur obtinere quod desiderat, sicut dolis et fallaciis et aliis modis.