ARTICULUS II.

Quid, sit timor?

Secundo quaeritur de timore, Quid sit?

Ad hoc proceditur sic:

Dicit Augustinus in libro de Civitate Dei: " Timor est perturbatio animi in exspectatione mali. "

Et Joannes Damascenus: " Timor est praeter naturam irrationalis systole, id est, contractio. "

1. Contra, primam sic objicitur: quia perturbatio animi paena est: timor au- tem secundum quod hic agitur de eo, culpa est: ergo per paenam male definitur timor.

2. Contra, secundam objicitur: Systole enim et diastole sunt motus cordis causati ex passionibus naturalibus, quae sunt quatuor, ut dicit Boetius, spes, timor, tristitia, et gaudium. Ergo systole non est aliquid timoris, sed de effectu ejus: et sic male definitur per systolem.

3. Adhuc, Joan. x, 12, super illud.: Mercenarius autem, et qui non est pastor, Glossa: " Timor est fuga mali ne perdat quod amat. " Et si haec est definitio: tunc definitur oppositum per oppositum: quod, esse non potest, quia oppositum essentialiter non potest esse opposito.

4. Ulterius quaeritur, Penes quid accipiuntur tot definitiones, cum unius rei unica sit definitio ?

Solutio. Dicendum, quod inductae assignationes quaedam sunt, non verae definitiones. Et prima, Augustini scilicet, describit timorem prout est quaedam passio et per proprium ejus effectum qui est perturbatio, et causam perturbationis, quae est malum paenae. Secunda autem datur secundum proprium ejus effectum. Objectum enim timoris malum est: quod dum cor fugit, in seipsum trahitur secundum systolem. Tertia vero datur per proprium motivum timoris. Sicut enim in praehabitis dictum est, amor est motivum timoris: nisi enim amaret quod habet, non timeret perdere. Et sic patet, quod sit timor secundum dicta Sanctorum.

Ad id ergo quod primo objicitur, dicendum quod timor secundum quod est actus voluntatis et rationalis animae, peccatum est: in se vero passio est, et sic ibi definitur.

Ad aliud dicendum, quod verum est, quod timor ibi definitur per proprium ejus effectum, cujus ipse est causa per se. Causa enim innotescit per effectum saepe.

Ad tertium dicendum, quod ibi non

definitur per oppositum motivum quod est amor, sicut habitum est.

Quod autem quaeritur, Penes quid accipiantur tot definitiones ? jam patet supra.