QUAESTIO I.

Utrum universale judicium sit futurum ?

Alensis 3. part. quaest. 25. m. 4. D. Thom. 3. part. quaest. 59. art 5. et hic quaest. 1. art. 1. Richard. art. 1. quaest. 1. D. Bonav. disp. 1. quaest. 3. etper totum. Durand. quaest. 1. Argent. d. 48. quaest. 1. art. 3. Snar. 3. part. tom. 2. disp. 53. sect. 1. Lale Coccius 2. tom. lib. 10. art. 5.

Circa istam distinctionem (a) quaero primo : Utrum universale judicium sit futurum? Quod non, Joan. 12. Nunc judicium est mundi.

Praeterea, Nahum primo : Non puniet Dominus bis in idipsum.

Item, Augustinus ad Hesichium : In quo quem invenerit ultimus ejus dies, in eo inveniet eum ultimus soeculi dies. Ex his omnibus cum hac addita judicium uniuscujusque est, quando moritur, sequitur quod nullum aliud judicium expectetur.

Hoc etiam probatur ratione, quia sententia non demandatur executioni, nisi post judicium, quia frustra sequeretur judicium post . executionem sententiae ; sed damnati erunt damnati ante diem judicii, et beati beati; ergo executio fieret ante judicium illius sententiae, quae tunc esset ferenda ; ergo tunc fieret frustra judicium.

Praeterea, in Psalm. 1. Non resurgent impii in judicio. Praeterea, Matth. 19. dicit Christus Apostolis: Sedebitis super sedes duodecim judicantes duodecim tribus Israel ; ergo Apostoli non judicabuntur. Et pro hoc est Gregorius Mor. 26. et ponitur in littera d. 47. quod in judicio erunt quatuor ordines, unus illorum qui judicabunt, et non judicabuntur.

Oppositum, Augustinus 20. de Civit. Dei, cap. 21. loquens de fine libri Isaiae : Permittit, inquit, ipse Propheta fines Ecclesiae, ad quos per ultimum judicium, facta Beatorum malorumque discretione, venient, ubi pertractat diffuse illa verba Isaiae ult.

Veniet omnis caro in conspectu meo ado rare in Jerusalem, et egredientur, et videbunt membra hominum, qui praevaricati sunt in me, utens translatione septuaginta Interpretum, qua et communiter utitur: et in fine subdit : In bonis caro, in malis membra, vel cadavera nominantur profecto post resurrectionem carnis, cujus fides his rerum vocabulis omnino firmatur, illud quo boni et mali suis finibus dirimentur, futurum esse judicium declaratur.