PROLOGUS PRIMUS.

Universis Christi fidelibus inspectum oculo simplici praesens opusculum,

scriptor ejus praebet illius aeternae gustum dulcedinis quam sacra viscera Mariae Virginis mundo famelico profuderant. Si cymbalis bene sonantibus praesumpseris addere sonitum tintinnabuli fracti, statim collidetur suavitas harmoniae, quae per se dulciter antea resonabat. A. simili si attentavero Mariae laudibus impolitum quidquam addicere, quam laudant pariter astra matutina,

et cui jubilant omnes filii Dei, pertimesco, ne forte laus mea plus derogatio quam laudis cumulus videatur, Scio enim, quod ineffabilis est laus ejus, nec ad eam poterit homo vivens, etiamsi loqui detur Angelorum linguis et hominum, vel si plene caeleste noverit idioma : quoniam major est omni laude. Hanc enim gloriam sibi retinuit supernus artifex, cujus Virgo mater opus est speciale, nec alteri daturus est eam: quare de Maria per Prophetam dicit: Secretum meum mihi . Propter hoc etiam, de ejus specie toties replicat sponsus in Canticis, IV, 1 : Absque eo quod intrinsecus latet, soli pervium creatori, sed nulli cognitum creaturae: nam quanta sit Mariae species, qui dedit speciem, solus novit, Licet autem non ignoraverim beatam Virginem exaltari, accedente homine ad cor altum, complacuit tamen de ejus laudibus saltem modicum quid elucidare ad praesens, urgente me charitate ejus et magnitudine promissorum. Qui elucidant me, inquit, vitam aeternam habebunt .

Si vero quaeratur, unde mihi tanta praesumptio, quod apposuerim quodammodo ponere os in caelum, cum ipsa sit in cujus laudibus omnis lingua balbutit, vivit Dominus, ecce causa. Molestabar nimis et aegre ferebam, quod nullus Doctorum vita et litteris ad hoc idoneus, Mariae testimonia velut spicas triti- ceas per agros Scripturae collegisset, et quasi per fasciculos, id est, capitula colligasset, quasi non audisset illud propheticum : Beati qui scrutantur testimonia ejus . Cujus? ejus cujus venter acervo tritici comparatur , et quae per montem Galaad figuratur . Cum vero non essem tam profundi sensus ut scirem Scripturas sacras exponere, ne spado viderer deflorans virginem, id est, Scripturam sacram non foecundans, apum prudentiam placuit imitari, quarum studiosa sedulitas ad favos conficiendos undecumque potest, colligit mel et ceram. Suggesserunt autem mihi materiam moderni Doctores et antiqui Theologi, Biblia mediante, de quorum puteis extraxi laticem novellas plantulas educantem, de quorum simila panem proposui corda famelica confirmantem, de quorum racemis expressi calicem contemplationis mira dulcedine inebriantem,

Duplex autem principalis fructus ex inspiratione praesentis operis devote lectori per Dei gratiam poterit provenire, perspicacior scilicet illuminatio intellectus, et vehementior inflammatio affectus, in cognitionem et dilectionem Virginis gloriosae, ut ad intellectum cognitio, ad affectum dilectio referatur. Poterunt etiam minus capacium sensus erudiri,si ruminaverint findentes ungulam. Poterunt studia magis subtilium, si supercilium dimiserint, saltem per occasionem provehi ad majora. Hoc lucrum quadruplex de labore meo principaliter inquirebam, totum reciprocans ad honorem sanctae AdminBookmark , quae cum Filio dicit: Quicumque glorificaverit me, glorificabo eum: qui autem contemnunt me, erunt ignobiles .

Si vero quispiam judicaverit me indiscretum concordantias apponendo, scire debet, quia vere quidquid antiqui dixerunt de Sapientia divina, moderni exponunt de matre sapientiae, cui cum Sapientia tam multiplex est unio, quod cum univoca sit generatio, quasi emphabolice Sapientia nominatur. Quod si reprehendar de multiloquio, respondebo, quod prolixe loqui de dulci Maria valde dulcis erat materia: et quia mihi vacabat, et bonum erat hic esse, diutius complacebat tam dulcia ruminare. Enimvero si capacitati simplicium quorum causa scribere coeperam, fecisset obicem breviloquium meum, dignus exstitissem fraudari praemio quod Dei genitrix non obscurantibus, sed elucidantibus se repromittit.

His ergo de causis usurpavi mihi cotis officium, quae ferrum praevalet acutum reddere, cum sit inutilis ad secandum.