1. De sancto Eskillo.

In 1. Vesperis.

Antiphonae.

1. Laudent Sudermanniae

Pueri parentem,

In prole Britanniae

Lapsos erigentem.

2. Confirmavit Dominus

Eskillum pastorem,

Quem despexit populus

Sequens vastatorem.

3. Fidens in principibus

Turba gloriatur,

Ruina sculptilibus

Iuste praeparatur.

4. Iucunda laudatio

Gentis cum decore,

Quam pastoris passio

Traxit ab errore.

5. Portas tuas, Suecia,

Praesul confortavit,

Dum divina gratia

Fidem restauravit.

Ad Magnificat.

A. Eskille, flos praesulum,

Pater pietatis,

Clericorum speculum,

Doctor veritatis,

Tuae replet saeculum

Fama sanctitatis,

Iunge tuum populum

Civibus beatis.

Ad Matutinum.

Invitatorium.

Eskilli martyris

sollemnia

Devote celebret

ecclesia.

In 1. Nocturno.

Antiphonae.

1. Postquam hiems abiit

Infidelitatis,

Flos virtutis prodiit

Novae dignitatis.

2. Clamat praeco populis

Missus a supernis,

Ut intersint epulis

Regis sempiterni.

3. Fugat servus Domini

Varios errores,

Nulli cedens homini

Novos docet mores.

Responsoria.

1. Olim spinas germinans

Terra vastitatis

Fit iam rosas generans

Hortus voluptatis,

Venit dies terminans

Noctem vanitatis,

V. Dum luxit Sueciae

lux divinae pietatis.

2. Gaude, felix Suecia,

Laudans salvatorem,

Quia de Britannia

Tibi dat pastorem,

Qui vas plenum gratia,

Christi dans odorem,

V. Erranti tibi sit

divinum dux in amorem.

3. Lucem reddit nebulae

Stella matutina,

Novae vitam plantulae

Patris dat doctrina,

Quae rigata sedule

Lege de divina

V. Caelis electos

mittit flores sine spina.

In 2. Nocturno.

Antiphonae.

1. Idola colentium

Arguit conatus,

Pro Christo martyrium

Subire paratus.

2. Aures claudunt aspides

Dentibus stridentes,

Et in patrem lapides

Iaciunt torrentes.

3. Scelus gentis flebilis

Hoc quam sit indignum,

Sanguis indelebilis

Evidens est signum.

Responsoria.

1. Surgit operarius

Pervigil in messe,

Non ut mercenarius

Cupiens praeesse,

Sed sicut eximius

Pastor vult prodesse,

V. Sanguine defendens

salvum numerum gregis esse.

2. Turbas diis libantium

Arguit securus,

Minas spernens bostium

Hostia futurus,

Nec patrem eximium

Flectit sermo durus,

V. Nec lapis aut ferrum,

sed firmus stat quasi murus.

3. Verbi ferit gladio

Fidem impugnantes,

Lucis obstant radio

Tenebras amantes,

Quem sacravit unctio,

Premunt malignantes,

V. Vas auri solidum,

vas ornatum reprobantes.

In 3. Nocturno.

Antiphonae.

1. Alabastrum frangitur,

Fragrat vis odoris,

Omnis aegris tollitur

Passio languoris.

2. Clamant ad suffragia

Prius impugnantes,

Suorum vestigia

Pedum adorantes.

3. Pro nobis egregie

Deum martyr ora,

Ut nos caeli curiae

Reddat mortis hora.

Responsoria.

1. Transit ab exsilio

Mundi rubricatus,

In caeli rosario

Digne transplantatus,

Bino pollens praemio

Gaudet laureatus,

V. Qui gregis ante Deum

velit excusare reatus.

2. De patris absentia

Grex est in maerore,

Sed resumit gaudia

Magno cum favore,

Quia mirabilia

Fiunt a pastore,

V. Et sibi pro tanto

gaudens congaudet honore.

3, O proles Britanniae,

Recta via morum,

Praesul Sudermanniae,

Tutor orphanorum,

Te collaudat hodie

Digne gens Sueorum,

V. Quam, pater eximie,

ducas ad regna polorum.

In Laudibus.

Antiphonae.

1. Legem hausit avide

Flore iuventutis,

Inde multis provide

Potum dans salutis.

2. Spreto solo patriae

Exit inspiratus,

Ad salutem Sueciae

Caelitus vocatus.

3. Iuxta votum omnium

Praesul sublimatus.

Est in virum alium

Subito mutatus.

4. Principem non timuit

Sacer hic Elias

Nec timens deseruit

Sacrae legis vias.

5. Exstinxerunt impii

Lumen tam praeclarum,

Quia lucem filii

Spernunt tenebrarum.

Ad Benedictus.

A. O praesul mitissime,

Patriae lucerna,

Lux errantis animae,

Devios guberna,

Ductor gregis optime,

Nos duc ad superna,

Ubi pascet intime

Gregem lux aeterna.

In 2. Vesperis.

Ad Magnificat.

A Vale, pater patriae,

Fidei zelator,

Ritus idolatriae

Felix triumphator,

Nobilis ecclesiae

Doctor et fundator,

Tuae sis familiae

Dulcis consolator.