2. De sancto Eustachio.

In 1. Vesperis.
Antiphonae.

1. Caesar dum Traianus,
Quamvis tunc paganus,
Monarchiae praesideret
Et rem publicam augeret,

2. Tiro fidelis Placidus
Illi militavit,
Strenuus et acidus
Regna dispensavit.

3. Totus in virtutibus
Placidus nutritus,
Triumphandi nutibus
Maxime peritus.

4. Caritatis oculis

caelum pertraiecit,
Dapibus et poculis
Pauperes refecit.

5. Ex gentili largitate
Effluent encenia,
Quae favente deitate
Intrant caeli moenia.

Ad Magnificat.

A. Rupem cervus dum ascendit,
Retiaculum tetendit,
Placidum quo comprehendit
Tali sub oraculo:

Placide, tu me instigas,

Beneficiis alligas,

Me venaris et imbrigas

Caritatis iaculo;
Tu et tui,
Vultis frui

Vita, quae non labitur,
Paganismum
Fac baptismum,

Illa vobis dabitur.

Ad Matutinum.
Invitatorium.

O consurgamus,

laudes Christo referamus,
Eustachium iustum

bove qui sacravit adustum.

In 1. Nocturno.
Antiphonae.

1. Beatus Eustachius
Graviter tentatus
Perdidit celerius
Res et magistratus.
2. Mortua familia
Pecora, iumenta
Et quaeque utilia
Nulla sunt inventa.
3. Furtim in triclinium
Intrat fur et latro,
Fugit morticinium
Noctis vir sub atro.

Responsoria.

1. Theopista doloribus
Anxia deduxit
Geminos prae foribus
Parvulos et luxit,
V. Cumque nescivit,

quo vir fugitivus abivit.
2. Itur in aquagium,
Uxor in obstagium
Naulo pro petito

Illis non habentibus,
Dare desiderantibus
Rapitur marito,
V. Coniunx intacta

sed permanet obside facta.
3. Eustachii natos

lupus et leo diripuerunt,
Hos quoque ablatos

homines vivos tenuerunt;
Hoc pater ignorat,

matrem natos quoque plorat,
V. Ut potuit cumque,

damnum deplanxit utrum-
que.

In 2. Nocturno.
Antiphonae.

1. Paupertate vapulat
Et inter egenos
Campi custos exsulat
Annos per quindenos.
2. Traianus dimiserat
Nuntios per gyrum
Illum, quem amiserat,
Requirendo virum.
3. Vulnerum percussibus
Illum invenerunt,
Caesaris aspectibus
Salvum reduxerunt.

Responsoria.

1. Longinquo de confinio
Dum adproximatur,
Et suo dominio

Miles praesentatur,
Vultu cultu regio

Carus redimitur,
Sortis fortis legio
Sibi adnuitur,
V. Ut regnum vernet,

regni quoque iura gubernet.
2. Ortum est disturbium
Dissensione mota
Castrorum et urbium
[Adest] virtus tota,

Cunctis civitatibus

Fatur, ut armentur,
Regni dignitatibus,
Ut auxilientur;
V. Convenerunt cuncti

regno cum foedere iuncti.
3. Eustachii nati

venerunt ad bella parati,
Viribus armati,

forti certamine grati,
Armis ditati,

bellantibus associati;
V. Non pater hos novit,

quos longa remotio fovit.

In 3. Nocturno.

Antiphonae.

1. Barbarorum sic quievit
Tumefacta gloria
Quam Eustachius delevit
Habita victoria.
2. Agapitus, Theopistus

Tentum quoddam intraverunt,
Conferendo, colloquendo
Sese fratres didicerunt.

3. Theopista clam hoc audit,
Benedixit Dominum,
Redemptori Deo plaudit,
Qui dat vitam hominum.

Responsoria.

1. Ad virum profecta recta
In maxilla prudens illa
Sternit, cernit

Cicatricem vulneris,
Nescit coniugalem talem,
Quem agnovit, cui vovit
Maritari

Sub nutu confoederis;
V. Clam coepit flere

lacrimas nequiens cohibere.
2. O Romane, vive sane
Dixit capitaneo,
Hac in terra sub acerra
Barbaris admoneo,

Meum ob Eustachium
Da salutis brachium
V. Et, vir praeclare,

fac me tibi compatriare.
3. Hanc mox agnovit,

cui blande talia movit:
Eustachius dicor,

uxor tibi dulcis amicor,
Es mea, dato fidem;
tuus et sum, dixit eidem.
V. Cuncti laetantur,

omnes et ei famulantur.

In Laudibus.
Antiphonae.

1. Natorum absentiam
Pater quaerulatur,
Ob quorum praesentiam
Deum deprecatur.
2. O divina gratia,
Suntne mei nati
Per terrarum spatia
Vivi vel necati?
3. Domina quantocius

Verbis his respondit:
Gratulare potius,
Hos vita recondit.
4. Cum commilitonibus
Vidi hos manere,
Vacantes sermonibus,
Bene se habere.
5. Cum directo citius
Nuntio venerunt,
Patrem, matrem laetius
Illi susceperunt.

Ad Benedictus.
A. Eustachius cum paribus
Suis familiaribus
Statuuntur et ponuntur

In camporum sedibus,
Audax leo dante Deo,
Quamvis ferus et severus,
Inclinatus et prostratus
Fit illorum pedibus;

Minax mortis idem fortis
Ad mactandum et vorandum
Fuit missus, sed abyssus

Illis nulla nocuit.
Danielem qui fidelem
Securavit et tutavit
In leonum lacu, bonum

Deus hunc praedocuit.

In 2. Vesperis.
Ad Magnificat.

A. Eustachius poplitibus
Flexis cum complicibus
Videns bovem aeneum
Inflammatum igneum
Dixit: qui es Dominus

Eminus et comminus,
Respice in omnes gentes
Passionem meam colentes.
Ignem, aquam, bestias,
Exsilium, molestias,
Paupertatem, vim bellorum,
Ad usum hospitiorum
Omne malum his averte;
Detur illis, Iesu, per te
Salus, virtus et solamen.
Angelus respondit Amen.
Corpus, vestes cum capillis
Rogus non ussit in illis;
Mortui, sed non combusti
Deo vivunt modo iusti.
Dante Deo nos sequemur,
Ut cum iustis gloriemur.