Acta Francisci Pp. 1199

tutum firmum praebuit exemplum, omnino Deo paupertatique et assiduae

orationi consecrata adhibita conversatione. Tempore Primi Totius Mundi

Belli, condiciones christifidelium illarum partium asperrimae factae sunt et

omnes gentes numero pauciores, quae ad Turcarum stirpem non pertinerent,

illinc eiectae sunt ac protinus exterminatae. Dira exinde persecutio contra

Armenos saeviit et in universos christianos, qui in Turcia residebant, exces-

sit. Tantis in adiunctis Reverendissimus Dominus Flavianus, licet effugiendi

vitaeque salvae faciendae gauderet facultate, strenuus tamen cum fidelibus

remorari maluit, quos spe perseveranter refovebat et exhortabatur, ut in fide

iugiter confirmarentur. Ineunte aestate anni mcmxv, una cum presbyteris et

laicis quibusdam iniuste arreptus est, quia unus communitatis suae agnitus

moderator. In carcere loci vulgo Djazireh-ibn-Omar, ubi reclusus erat, apos-

tolatum suum perrexit et clericis Dioecesis suae mandavit, ut christifideles

sacramenti reconciliationis virtute ac Eucharistiae dominicalis celebratione

roborarent. Navus etiam fuit inter sodales suos captivitatis, quos adhorta-

tus est, ut ad confessionem sacramentalem recurrerent, Sanctam Missam

ab ipso in carcere celebratam participarent atque orarent quo sanguine

suo fidei testimonium promptius perhiberent. Duris deinde inquisitionibus

diutinisque cruciatibus subiectus, demum die XXIX mensis Augusti eodem

anno plumbis interemptus est. Nam vehementer renuerat mahometanam

religionem amplectens fidem abiurare, quapropter palmam martyrii adeptus

est eiusque corpus una cum aliis christianis interfectis in flumen Tigridem

proiectum est.

Perseverante fama martyrii Servi Dei, Beatitudo Sua Ignatius Iosephus

II Younam apud Curiam Patriarchalem Antiochenam Syrorum, auditis una-

nimis propositis Synodi extraordinariae Ecclesiae Syro-Catholicae adeptaque

Congregationis de Causis Sanctorum licentia, anno mmx Inquisitionem dioe-

cesanam super martyrio inivit. Expletis iure requisitis ac Positione confecta,

die xxi mensis Iulii anno mmxv, Congressus Peculiaris Consultorum Theologo-

rum factus est, qui prosperam censuit sententiam. Patres Cardinales et

Episcopi in Sessione Ordinaria die VII mensis Augusti eodem anno habita

agnoverunt mortem Servi Dei verum fuisse martyrium.

Nosmet Ipsi die VIII mensis Augusti anno mmxv concessimus, ut Congre-

gatio de Causis Sanctorum Decretum super martyrio promulgaret atque

statuimus proinde, ut ritus Beatificationis die xxix mensis Augusti eodem

anno in oppido vulgo Taroun-Harisse perageretur.