5. De Nativitate Domini.

1. Nunc tibi, Christe, carmina laeta
Laude canamus pectore toto
Menteque pura, perpete voto.

2. Laus tibi semper, o Deus alme,
Mitis ubique, magnus in alta
Sede polorum, sanctus in aevum.

3. Unica patris almaque proles
Sophia, virtus, sola salutis
Spes, via nostrae pacis et auctor.

4. O Deus alme, altipotensque,
Nomine trinus namque, sed unus,
Te mane laudat terra polusque.

5. Qui patris alta sede per alvum
Virginis almum inviolatae
Natus in orbe nostra petisti.

6. O quam stupenda res fuit acta,
Conditor orbis est homo factus,
Est et creatus ipse creator.

7. Et Deus altus omnipotensque
Ubera suxit parvula matris,
Praesepe parvus pausat ut infans.

8. Qui regit omne atque cibavit,
Quidquid ubique vivit, ubique,
Namque per illum omnia constat.

9. Crevit ut aetas certa per annos
Terque decennis tinctus in undis
Gratia plenus Jordanis amnis.

10. Spiritus almus utque columba
Venit in illum, vox sonat atque:
En meus iste filius est jam.

11. Postque peregit plurima mundo
Signa salutis, suscitat atra
Morte peremptos mentis et actor.

12. Et pius auctor plurima perquam
Verba salutis fundit in aures
Dulcibus odis discipulorum.

13. Tempora cernens tota peracta
Curriculorum, ut redimeret
Sanguine fuso saecula cuncta,

14. Tunc homo Christus, agnus honestus,
Immaculatus, hostia pura
Sponte volebat namque moriri.

15. In cruce passus, inde levatus
Atque sepultus in monumento
Marmore tecto maximus heros.

16. Venerat ut post tristia facta
Tertia solis lux pia terris,
Surgit ab atra morte redemptor.

17. Cernit et illum turba suorum
Discipulorum et crucis almae
Vulnera dira vidit in illo.

18. Hoc fuit, utque totus in illum
Crederet orbis, quem quoque coeli
Scandere regna viderat alta.

19. Lausque et honor cui sit, rogo,
Semper cum patre summoque Deo,
Gloria, virtus jam sine fine.

20. Semina verbi sparge per orbem
Gentibus, ut te rite canentes
Laudibus ornent, dulcis amator.

21. Psallite summo, psallite regi
Psallite Christo, psallite Deo,
Psallite vivo, psallite vero.

22. Hosanna in altis, hosanna in astris,
Hosanna in arvis, hosanna in undis,
Hosanna in istis, o Deus odis.

23. Gloria patri, gloria nato,
Gloria sancto spiritui, qui
Summa potestas, sanctus in aevum.