6. De Fecunditate sanctae Mariae.

R . Venite et gaudete

Natum Christum Dominum.

1. A superna coeli parte
angelus dirigitur,
Ut Mariam fecundaret
de sancto spiritu.

2. Bene nata, desponsata
virgo pulchra nimium,
Pater elegit templum tale
filioque thalamum.
3. Clara producens stirpe
ex regali decore
Jesse virga de radice
florem nardus protulit.

4. Dum clamat per Isaiam
prophetalis nuntius:
In utero virgo habebit
partetque filium.
5. Ecce cogitante ipsa
Gabriel adnuntiat:
Ave, Maria sacrata,
te Deus inluminat.

6. Fecunda de templo pergens
ad montana properat,
Ad cognatam, ut audivit,
currit jam, ut poterat.

7. Gaudet infans gestiendo
intra ventris ambitum,
Creatorem summum sensit
adoratque Dominum.
8. Hic a Deo venit celsus
ex virginali utero,
Per quem mundus est ereptus
claudus atque naufragus.
9. Infans crescit, conditor, en,
infra ulnas gerulae,
Proficiensque aetate
decus sapientiae.
10. Kallidus hostis Herodes
zelat natum Dominum,
Ipsum quaerit interficere,
Joseph vertit Aegyptum.
11. Lugubris surrexit dies
matrum in infantia,
Crines pectoraque tundunt
in natorum funere.
12. Magi properant a longe
demonstrante sidere,
Trinitatem adorantes
redeunt ad propria.
13 Nihil valent artes dirae
a Dei potentia,
Finem Herodis testatur,
poenam mortis terminat.

14. Ornat mundum puer sacer
subditus parentibus,
Templo patris legit librum
de se ipso protinus.
15. Primum signum Gallilaeae
opera mirabile:
Laticem vertit in vinum
et Falernum nobilem.
16. Quibus mirans archisedens
testatur eloquio:
Meliorem reservasti
vinum in convivio.
17. Renovata cuncta Christi
exhibens ecclesia,
Desponsavit dote sacra
nostra gaudens tempora.
18. Solvit vincula humana,
quae peccator vinxerat,
Lignum vetitum elisit
cruce pendens trophea.
19. Tertia die surrexit,
fide nostra creditur,
Ad infernum properavit
pro multorum mugitu.
20. Venis tandem, benedicte,
Jesu bone, optime,
Relaxare, qui prolixo
trusi erant carcere.

21. Xristus mordet et infernum

morsuque mirifico,

Laureatus cum triumpho

revertit ad solium.