Quinquagena I.

1. Summum principium

Omnis principii,

Iusti iudicium

Agens et impii,

Praesta per filium

Donum consilii,

Bonum initium

Hymni eximii.

2. Supreme conditor

Bonorum omnium,

Cuius subordior

Fari praeconium,

Praesta, te deprecor,

Per tuum filium

Huius, quod molior,

Felix principium.

3. O diligibilis

Divina bonitas,

Inperscrutabilis

Cuius est deitas,

A tuis famulis

Tua benignitas

Pellat odibilis

Hostis versutias.

4. Incommutabilis

Et clara veritas,

Qua noxae flebilis

Abscedit falsitas,

Meae culpabilis

Vitae obliquitas

Ducatur regulis

Legis ad semitas.

5. O summa veritas

Ac ineffabilis

Et clara puritas

Imperturbabilis,

Recedat pravitas

Per te damnabilis,

Quam cudit Satanas

Cum suis famulis.

6. O delectatio

Quietans omnia

Hic in exilio

Nec non in patria,

Culpae corruptio

Me premit varia,

Cuius sanatio

Tua sit gratia.

7. O potentissime

Creator entium

Et superoptime

Inspector cordium,

Meae sis animae

In adiutorium

Et vires deprime

Me persequentium.

8. Nomen deificum,

Nomen mirabile,

Nec per theologum

Quemquam effabile,

Licet incognitum,

Tamen amabile

Per mundi ambitum

Et praedicabile.

9. O praeclarissimum

Lumen scientiae,

Infunde radium

Intelligentiae

Meum in animum

Et sapientiae,

Quem foedat plurimum

Nubes inscitiae.

10. Pax, universitas

Per quam conectitur,

Lex atque veritas,

Qua et construitur,

Dolus et falsitas

Procul abicitur,

Fides et aequitas

Nobis indicitur.

11. O causalissima

Veraque deitas,

In qua est optima

Et summa entitas,

Qua et plenissima

Exstat paternitas,

Proles verissima

Et prima caritas.

12. O vita omnium

Vitam vivificans

Et lux viventium

Visum illuminans,

Malos per meritum

Vitae purificans,

Iustos per praemium

Caeli deificans.

13. Summa paternitas

Et filiatio

Altaque caritas

Sive conexio,

Summa infinitas

Absque principio,

Te nulla entitas

Capit vel ratio.

14. Ens, cuius gratia

Est omnis statio,

Omnis essentia

Et omnis motio,

Ex sapientia

Nostra sit actio,

Tandem in gloria

Sit collocatio.

15. Ens, indicibilis

Cuius maioritas

Praestat et singulis

Tua prioritas,

Te laudum titulis

Nostra minoritas

Extollit, flebilis

Quam premit pravitas.

16. O trina unitas

Substantialiter

Et una trinitas

Sed personaliter,

Mea te parvitas

Petit humiliter,

Eius satietas

Sis aeternaliter.

17. O pater luminum,

Qui lucem generas,

Nostrorum criminum

Quae pellit tenebras,

Illustra mentium

Nostrarum latebras,

Expelle vitium,

Infunde gratias.

18. O rex mirabilis

Dictus Emmanuel,

Quem laudum titulis

Extollit Daniel,

Suis oraculis

Profert Ezecbiel,

Ad partum virginis

Nuntiat Gabriel.

19. Lumen spiritibus

Intellegibile,

Sed nullis sensibus

Comprehensibile,

Mariae precibus

Sit impetrabile,

Quod bis carminibus

Stat deprecabile.

20. Aeterne genitor

Aeterni filii,

Da mihi, deprecor,

Donum consilii,

Quo fiam dignior

Aeterni praemii,

Qui modo deprimor

Poenis exsilii.

21. Intellegibile

Verbum credentibus,

Sed incapabile

Externis gentibus,

Aufer benevole

A nostris mentibus

Onus culpabile

Cum noxae sentibus.

22. O eucharistia

Electos procreans,

Caelesti gratia

Devotos renovans,

Corda maerentia

Sis modo recreans,

Interna gaudia

In illis reparans.

23. Iesu, rex gloriae,

Rex magni nominis,

Magnae potentiae

Et fortitudinis,

Per matris gratiae

Vim deprecaminis

Redde nos patriae

Beatitudinis.

24. O summa trinitas

Sed personaliter,

At una deitas

Essentialiter,

Nostras angustias

Misericorditer

Aufer, dans gratias

Nobis hilariter.

25. Ignis deifice

Cuncta exsuperans

Et potentifice

Iustos illuminans,

Esto mitifico

Ad bonum revocans,

Quos premit hostice

Caro tabificans.

26. O vivacissima

Vita viventium

In tota machina

Mundi vigentium,

Per patrocinia

Matris credentium

Audi suspiria

Amare flentium.

27. Pax, amicitiam

In rebus construens,

Vilem discordiam

Ab eis removens,

A me vecordiam

Sis, precor, abigens,

Ne in dementiam

Ruam insipiens.

28. O ineffabilis

Virtus et gratia,

Incogitabilis

Mentis industria,

Intellegibilis

Intellegentia,

Superamabilis

Sed sapientia.

29. O decor deice

Decorans omnia,

Tibi catholice

Appropinquantia,

Aufer mirifice

Nos perturbantia,

Corda seraphice

Fac te amantia.

30. O finis omnium,

Pater omnipotens,

Nec non principium

Cuncta circuiens,

Omne mendacium

Sis a me removens,

Dictis veracium

Me semper instruens.

31. O summa trinitas

Atque mirifica,

Res terrae varias

Creans ac caelica,

Precamur, animas

Nostras justifica

Ac ignorantias

Sapientifica.

32. O bonum inclitum,

Ex quo sunt omnia,

Spirans paraclitum

Cum sapientia,

Canentes cantica

Haec cum laetitia

Duc post interitum

Carnis ad caelica.

33. Opifex deice

Omnis creabilis,

Turmae angelicae

Superlaudabilis,

Ecclesiasticae

Plebi amabilis,

Mihi specifice

Superamabilis.

34. Ens principaliter

Creatis dominans,

Te liberaliter

Sanctis communicans,

Hostis serviliter

Tuos humilians

Confusibiliter

Discedat rugitans.

35. Auctor o luminum,

Pater omnipotens,

Emittens radium

Et verbum sapiens,

Cor meum stolidum

Esto erudiens,

Currens per vitium

Velut insipiens.

36. Dei unitio

Superamabilis,

Divo nos radio

Ligans et vinculis,

Ab omni vitio

Serva et scandalis,

A stygis crucio

Atque ab aemulis.

37. O summa deitas

Atque potentia,

Cuius se bonitas

Ad exsistentia

Extendit, pietas

Tua et gratia

Solvat praeteritas

Culpas et vitia.

38. O verbum deicum

Inaccessibile,

Quod nec per physicum

Es eloquibile,

Per sanctum spiritum

Nobis audibile

Et per seraphicum

Ignem amabile.

39. Lux carens tenebris,

Illustrans omnia,

Quae sunt in superis,

Atque terrestria,

Succurre miseris

Pro tua gratia

In domo carceris

Vinctis ob vitia.

40. Summa essentia,

Dans esse omnibus

Per mundi spatia

Iam existentibus,

In purgatoria

Poena plangentibus

Succurrat gratia

Tua celerius.

41. Ignis ab omnibus

Irretentibilis

Et in te penitus

Es invisibilis,

O sancte spiritus,

Deus amabilis,

Me liga fortius

Amoris vinculis.

42. Lux lucens iugiter

In existentia

Sed specialiter

Tui capacia,

Modo feliciter

Me reple gratia,

Fruar perenniter

Ut caeli gloria.

43. Artifex omnium,

Cuius potentia

Coniungit entium

Divisibilia,

Paca credentium

Modo confinia

Iam dissidentium

Pro vana gloria.

44. Pulchrum pulchrificans

pulchrificabile,

Decor specificans

Specificabile,

Sis meum ordinans

Rationabile,

Cor quoque reparans,

Ut sit amabile.

45. Virtus vivifica

Aeterni pneumatis,

Quem laudant cantica

Huius poematis,

Tui rectifica

Virtute dogmatis

Acta tristifica

Praesentis schismatis.

46. O spirans gratia,

Pneuma salvificum,

Replens scientia

Chorum cherubicum,

Precor industria

Mentis per canticum,

Duc ad caelestia

Gregem catholicum.

47. O magne Domine

Superlaudabilis,

Sed non ab homine

Comprehensibilis,

Colendus carmine

Virtutum titulis

Caeli ab agmine

Et terrae incolis.

48. O sapientia

Missa de superis,

Carnis materia

Dum nobis iungeris,

Tua clementia

Det nobis miseris

Ex indulgentia

Levamen sceleris.

49. O dulcis Domine,

Regnans perenniter

Divino numine

Cum patre pariter

Sanctoque flamine,

Misericorditer

In iudicamine

Nos voca leniter.

50. Lucis essentiae

Causalis ratio,

Sanctae ecclesiae

Quam laudat contio,

Misericordiae

Matris oratio

Nostrae miseriae

Sit sublevatio.