Secunda Quinquagena.

51. Ave, regis iustitiae

Thronus et mater gratia e,
Tua per haec praeconia
Nobis fer patrocinia.

52. Ave, magistra sapiens,
Ecclesiam erudiens
Articulis in fidei,
Qua caelis possit invehi.

53. Ave, lux fulgentissima
Mentis illustrans intima,
Lucis tuae per radios
Propelle adversarios.

54. Ave, Messiae genetrix,
Educatrix et alitrix,
Nos eius mortis pretio
Praeserves ab exitio.

55. Ave, praecelsa domina,
Quam beatorum agmina
Venerantur in superis
Nobis succurre miseris.

56. Ave, quae super sidera
Sedes in prolis dextera,
Miserere me famulum
Redactum in opprobrium.

57. Ave, fructum iustitiae
Ferens sanctae ecclesiae,
Ad me tuendum propera
Morsum inferni vipera.

58. Ave, nata altithroni
Luxque maris undisoni,
Mihi, stella lucifera,
Lumen fer vitae vespera.

59. Ave, virilis nescia

Thori, quam Christi gratia
Ordinavit prae omnibus
In matrem mulieribus.

60. Ave, turris altissima
Caeli attingens ultima,
Cor meum cura anxium
Propter labem peccaminum.

61. Ave, suave lilium,
Aeterni patris filium
Trahens de caeli curia
Tua dulci fraglantia.

62. Ave, cuius visceribus
Natus est Dei filius,
Onus meum allevia,
Quo gravor currens in via.

63. Ave, peccati nescia
Ex speciali gratia
Deitatis magnificae,
Te servantis mirifice.

64. Ave, virgo, flos redolens,
Pias mentes reficiens,
Insistentes servitiis
Tuis redde deliciis.

65. Ave, quae individuae
Trinitati assidue
Astas, hanc laudans iubilis
Cum sanctis atque angelis.

66. Ave, virgo ex milibus
Electa, cum humilibus
Incedens legis trutina,
Mentes nostras illumina.

67. Ave, sponsa spiraminis
Omnisque expers criminis,
Efficaces ex opere
Fac nos divino munere.

68. Ave, virgo amabilis,
Cui proles mirabilis
Post mortis suae gladium
Resurgens dedit gaudium.

69. Ave, mater o tenera,
Sublevata ad sidera,
Sis iuvamen colentibus
Te sinceris affectibus.

70. Ave, cuius hospitium
Ventris per caeli nuntium
Elegit Dei filius,
Exstans mundo propitius.

71. Ave. vellus Ieroboal,
Intactum cuius virginal
Regem nobis clementiae
Parit atque iustitiae.

72. Ave, lux, cuius lumine
Procelloso de turbine
Sublevantur insontium
Corda ad te clamantium.

73. Ave, cuius memoria
Mentis purgatur scoria.
Per tuum patrocinium
Nostrum salva collegium.

74. Ave, quae nos laetificas,
Cum ut vitis fructificas,
Meri propinans calicem
Cordis frangentem silicem.

75. Ave, quam vatis gladius
Confodit olim acrius,
Nam dolor et tristitia
Sunt omnibus communia.

76. Ave, rectorum gloria,
Cuius iugi memoria
Exhilarescit animus
Amore tibi intimus.

77. Ave, mater virginea,
Feta prole aetherea,
Me caeli reple dapibus
Supernis cum principibus.

78. Ave, quam imperterritus
Fidelium exercitus
Collaudat unanimiter,
Quem adiuva hilariter.

79. Ave, superno numine
Divo feta propagine,
Me ferum inclementia
Exorna patientia.

80. Ave, quam caeli intima
Laudant per iubilamina,
At peccati oneribus
Tuis me leva precibus.

81. Ave, regina virginum,
Quae genuisti Dominum,
Qui principatur omnibus
Orbis terrarum finibus.

82. Ave, fruens deliciis
Supernorum, a vitiis
Tuum absolve famulum,
In laude tua sedulum.

83. Ave, quam amabiliter
Laudo et singulariter,
Me recommenda hodie
Nato atque cotidie.

84. Ave, o mater gratiae.
Causa nostrae laetitiae,
Fanti tua praeconia
Precum praebe suffragia.

85. Ave, florescens virgula,
Ex qua succrevit viola,
Quae odoris aspergine
Mentes replet dulcedine.

86. Ave, superni civitas
Regis, cuius divinitas
Tua stravit fundamina,
Serens virtutum semina.

87. Ave, repleta gratia
Parensque paris nescia,
Opem tuam fer miseris,
Constitutis in tenebris.

88. Ave, Maria genetrix
Dei eiusque alitrix,
Exoro te medullitus,
Infringe hostis impetus.

89. Ave, fraglans aureola
Et puritatis viola,
Ad natum preces porrige
Et actus meos dirige,

90. Ave, genetrix Sabaoth,
Quo depellitur Beemoth,
Qui est auctor mendacii
Atque carnalis vitii.

91. Ave, quam caeli milites,
Fecundi quoque palmites,
Qui veram vitem ambiunt,
Te venerari cupiunt.

92. Ave, ornata regio
Cultu, tuo suffragio
Fac, ut triumphent fortiter,
Ut coroner perenniter.

98. Ave, vita humilium
Et gaudium maerentium,
Papillis atque viduis
Tuis assis subsidiis.

94. Ave, cuius maternitas
Oves reducit perditas
Ad ovile ecclesiae,
Feno pascens iustitiae.

95. Ave, virgo amabilis,
Mundo, hosti terribilis,
Vitiorum sculptilia
Frange, o David filia.

96. Ave, cuius maturitas,
Praecipue humilitas,
Regnantem caeli solio
Tuo immisit gremio.

97. Ave, cuius notitia
Menti praebet solacia,
Intende iubilamini,
Quod tuo pango nomini.

98. Ave, myrtus fraglantiae
Et adamas constantiae,
Praesta triumphum regibus
Pro fide militantibus.

99. Ave, repleta gratia,
Cui cordis in laetitia
Servire glisco iubilis
Praeconiorum titulis.

100. Ave, beata millies,
Nunc salutata centies,
Da nulli unquam detraham
Bonisque non invideam.