Quinquagena II.

51. O bonum omnibus

Dans amicitiam

Veram praebentibus

Tibi militiam,

Da deprecantibus

Cordis munditiam,

Omnem a mentibus

Pellens malitiam.

52. O sapientia

Cum patre procreans

Cuncta causalia

Et bene ordinans,

Sis me ex gratia

Sapientificans,

Qui ex inscitia

Oberro cespitans.

53. Summa paternitas

Absque initio

Et filialitas

Seu filialitio

Et ita caritas

Sive processio,

Tua sit bonitas

Nostra salvatio.

54. Ignis, qui tribuis

Approximantibus

Tibi assiduis

Mentis conatibus

Amorem affluis

Devotionibus,

Assis indiguis

Meis precatibus.

55. Beata trinitas,

Cuius potentia

Nec non infinitas

Excedit omnia,

Pellat benignitas

Tua et gratia

Nostras miserias

Et adversantia.

56. Figura splendida

Patris substantiae,

Forma praefulgida

Cunctae essentiae,

Illustra turbida

Meae miseriae

Ducens ad lucida

Me caeli curiae.

57. Ignis innocue

Ardens in mentibus,

Ipsas proficue

Mundans a faecibus,

Assis assidue

Meis affectibus,

Servans assidue

Hos a sceleribus.

58. Ens existentibus

Esse constituens,

Bona clementius

Iisdem providens,

Nobis propitius

Sis et compatiens,

Quos gravat crebrius

Hostis insipiens.

59. Vivae fons gratiae,

O sancte spiritus,

Spirant quem unice

Pater et filius,

Sanctae ecclesiae

Assis divinitus,

Premunt angustiae

Quam nunc altrinsecus.

60. O lucens veritas

In mente hominis,

Quam nulla foeditas

Deturpat criminis,

Nos ducat pietas

Tui amaminis,

Quo est aeternitas

Beatitudinis.

61. O lumen, mentibus

Intellegibile

Te intuentibus

In caelo sedule,

Necte me fortius

Legali regulae,

Qui velut impius

Oberro frivole.

62. Virtus mirifica

Et supersapiens,

Vi potentifica

Res cunctas statuens,

Meum rectifica

Cor nunc deficiens,

Quod gens daemonica

Molestat saeviens.

63. Causa mirabilis

Et potentissima

Omnis creabilis

In mandi machina,

Finitis saeculis

In hac miseria

Laudem cum angelis

Te caeli regia.

64. O praestantissima

Et vera unitas,

Principalissima

Ac summa trinitas,

Te mea intima

Collaudat puritas,

Tibi ex anima

Dicendo gratias.

65. Ignis dans calidum

Appropinquantibus

Et mundum aridum

Existimantibus,

Cor meum algidum

Prae facinoribus

Fac tibi placitum

Piis laboribus.

66: O trina unitas

Essentialiter

Et una trinitas

Sed personaliter,

In qua paternitas

Potentialiter,

Verbum et caritas

Originaliter.

67. Pater, illumina

Tua potentia,

Fili, illumina

Nos sapientia,

Pneuma illumina

Tua clementia,

Duc ad intermina

Nos post praesentia.

68. Verbum, quo primitus

Facta sunt omnia,

Dum flaret spiritus

Sanctus per maria,

Assis divinitus

Tua clementia

Pressis iam penitus

Hostis ferocia.

69. Ignis vivifice

Igniens gelida,

Tibi unifice

Appropinquantia,

Corda mitifice

Nostra fac calida,

Quae luxu lubricae

Carnis sunt frigida.

70. O pulchritudinis

Fons et initium,

Beatitudinis

Dans beneficium,

Praesta per virginis

Sanctae suffragium

Nobis amaminis

Tui solacium

71. Causa mirifica

Bonorum omnium

In mundi fabrica

Iam exsistentium,

Plebem vivifica

Per pacem cordium,

Quae impacifica

Est per disturbium

72. Vita disseminans

Cuncta viventia

Et ad te revocans

Corda errantia,

Meum illuminans

Sis tua gratia

Per multa fluitans

Modo flagitia.

73. O decor eaelice

Immarcessibilis,

Linguae angelicae

Inexpressibilis,

Plebi catholicae

Sis exaudibilis

Pressae non modice

Iam ab incredulis.

74. O inscrutabilis

Fons sapientiae,

Dator amabilis

Pacis et gratiae,

Nobis cum angelis

Da statum gloriae

Ac terrae incolis

Foedus concordiae.

75. O pax, quae congregas

Universaliter

Devotas animas

Tibi hilariter

Laudum excutias

Solventes pariter,

Ad sedes superas

Duc nos benigniter.

76. Ens recolibile

Es per memoriam,

Intellegibile

Per sapientiam,

Sed et amabile

Per tuam gratiam

Superlaudabile

Per providentiam.

77. O panis oriens

Ineffabiliter,

Devotos nutriens

Delectabiliter,

Sis me reficiens

Amicabiliter,

Cum mundum moriens

Linquam finaliter.

78. Esto propitius,

O rerum conditor,

Petit ardentius

Quod tuus debitor,

Da, ut in moribus

Sim compositior

Et in caelestibus

Sanctis vicinior.

79. O pulchra claritas

Verbi deifici,

Quam laudat puritas

Chori angelici,

Maxime caritas

Chori seraphici

Et luminositas

Chori cherubici.

80. Deus amabilis

Omni spiritui

Ac appetibilis

Et appetitui,

Da his cum incolis

Caeli te perfrui.

Qui te his titulis

Laudant assidui.

81. O Deus Elion,

Deus mirabilis,

Ac tu pantagathon,

Patri consimilis,

Et sacrum pneumaton,

nexus amabilis,

Superna in Sion

Iunge nos angelis.

82. Incognoscibilis

Es per prudentiam

Nec contemplabilis

Per sapientiam,

Nam noscit docilis

Per ignorantiam,

Quod non capabilis

Sis ni per gratiam.

83. Ens substantificum

Et supersapiens,

Statum angelicum

In te perficiens,

Praesta theoricum

Cor et intellegens

Mihi, phantasticum

Longe abiciens.

84. O filiatio

Paternae subolis,

O incarnatio

Indissolubilis,

O impraegnatio

Puellae nobilis,

Gratiae actio

Deo immobilis.

85. O ineffabilis

Summaque deitas,

Immensurabilis

Et alta trinitas,

Investigabilis

Essentialitas,

Superamabilis

Est tua bonitas.

86. O immutabile

Fundamen omnium

Ac diligibile

Plebi fidelium,

Coetum te sedule

Modo laudantium

Choro benevole

Iunge laetantium.

87. Vita vivificans

Cuncta viventia,

Ad vitam revocans

Et morientia,

Mentem sis renovans

Meam ex gratia,

Quam caro sordidans

Turpat per vitia.

88. Pater, qui filio

Praebes originem,

Eius consortio

Nexum amabilem

Spiras, incendio

Suo me habilem

Faciat praemio

Sive capabilem.

89. Ignis es lucidus

Potentialiter,

Tamen absconditus

Substantialiter,

Exaudi gemitus

Misericorditer,

Quos promunt spiritus

In poenis iugiter.

90. O virtutifica

Divina ratio,

Semper angelica

Quam laudat contio,

Sit a Satanica

Fraude defensio

Nostra deifica

Tua protectio.

91. O potens figule

Omnis creabilis,

Quem homo sedule

Laudat cum angelis,

Me tuae regulae

Liga capitulis

Errantem frivole

Multis piaculis.

92. Decor mirabilis

Et divinissime,

Invariabilis

Et superoptime,

Me tuis vinculis

Necte strictissime

A cunctis maculis

Mundatum animae.

93. Verbum altissimi,

Fons sapientiae

Et imbris optimi

Vitae ac gratiae,

Ne sinas supprimi

Natos ecclesiae,

Quos hostes pessimi

Turbant cotidie.

94. Ens menti hominis

Intelligibile

Nec non synderesis

Per vim amabile,

Mei nunc sceleris

Onus culpabile

Aufer et aetheris

Da regnum stabile.

95. O delectabile

Verum principium,

Intellegibile

Dans desiderium,

Vere amabile

Menti credentium,

Cordi terribile

Male viventium.

96. Causalis statio

Cunctorum stantium

Nec non et motio

Rerum mobilium,

Hoc famulitio

Te venerantium

Sit quietatio

Suarum mentium.

97. Pulchrum pulchrificas

Pulchrificabile

Sed et gratificans

Gratificabile,

Carmen hoc elegans

Sit acceptabile

Tibi, pacificans

Cor meum labile.

98. O ineffabilis

Divina unitas,

Sed explicabilis

Personis trinitas

Et applicabilis

Tribus identitas,

At vix capabilis

In his simplicitas.

99. O venerabilis

Summaque veritas,

Investigabilis

Cuius est dignitas,

At vere humilis

Et pura caritas

Erit capabilis

Res ad absconditas.

100. O summa trinitas

Excellens omnia,

Cui universitas

Pangit. praeconia,

Mea pusillitas

Incurvat genua,

Ut praestes gratias,

Dimittas varia.