Dicit igitur :

" Et, "

Supple, vidit Joannes.

" Spiritum sanctum. "

Ideo baptismus Christi est in Spiritu sancto. Act. I, 5 : Vos autem baptizabimini Spiritu sancto. Licet enim baptismus operetur gratiam ut dispositio disponens in subjecto (alias, subjectum) sicut etiam medicina operatur sanitatem, tamen efficienter homini operatur gratiam Spiritus sanctus.

" Tamquam columbam. "

Quia (alias, quae) sine felle esse dicitur : quia fellis peccati amaritudo per baptismum purgatur. Ad Hebr. XII, 15 : Ne qua radix amaritudinis sursum germinans impediat, et per illam inquinentur multi. Et ideo ei qui serpentinam habuit malitiam a Petro dictum est, Act. viii, 28 : In felle amaritudinis , et obligatione iniquitatis video te esse. Haec est columba quae cum signo misericordiae Dei in ramo virentis olivae reversa est ad arcam, hoc est, Ecclesiam . Cantic. ii, 14 : Columba mea in foraminibus petrae, in caverna maoeriae. Petra est Christus : foramina, vulnera : caverna maceriae, foramen lateris factum in jam macerato, etexsangui, et exanimi corpore : his enim passionibus operatur in baptismo per columbam.

" Descendentem et manentem in ipso. "

Tria dicit : benignitatem Spiritus, mansionem, et plenitudinem.

Benignitas notatur in descensu. Non enim descendit per naturae et personae inferioritatem, sed per bonitatem inclinans se nobis. Sapient. xii, 1 : 0 quam bonus et suavis est, Domine, spiritus tuus in omnibus ! Ideo dicitur cadere, Act. x, 44 : Cecidit Spiritus sanctus super omnes qui audiebant verbum.

Mansionem ad perseverandum, Isa.XI, 2 : Et requiescet super eum spiritus Domini : et hoc maxime competit Christo. In aliis enim inquietatur ad minus per venialia. Et licet maneat habitu in Sanctis, tamen in continuo actu, et omni modo non mansit nisi in Christo. Joan. I, 33 : Qui misit me baptizare in aqua, ille mihi dixit : Super quem videris Spiritum descendentem, et manentem super eum, hic est qui baptizat. III Reg. II, 15 : Requievit spiritus Eliae super Eliseum.

" In ipso. "

In hoc notatur plenitudo Spiritus, et demonstratio personae Filii in forma bap tismi. Plenitudo enim Spiritus est in fonte unde procedit. A Filio autem pro cedit sicut a Patre. Unde in Evangelio Nazarenorum legitur in isto loco : " Descendit in eum fons omnis Spiritus. " Joan.III, 34 : Non enim ad mensuram dat Deus spiritum : ibi enim Filius Spiritum diffundit ad membra vivificanda. Genes. 1, 2 : Spiritus Dei ferebatur super aquas.

" Et vox facta est de caelis : Tu es Filius meus dilectus, in te complacui. "

Demonstratio est personae Patris, ut verum sit quod dixit, Joan. XIV, 23 : Pater meus diliget eum, et ad eum veniemus, et mansionem apud eum faciemus.

Tangit autem hic duo : originem vocis, et testimonium.

Origo importatur in hoc quod dicit :

" Vox de coelo facta est. "

Vox quidem est verbi vehiculum. Et significatur processus Verbi a paterno corde, Psal. xliv, 2 : Eructavit cor meum verbum bonum. Cantic. ii, 14 : Sonet vox tua in auribus meis : vox enim tua dulcis. Psal. xxviii, 3 : Vox Domini super aquas, Deus majestatis intonuit.

" De coelo " summae Trinitatis a Patre. Psal xviii, 7 : A summo coelo egressio ejus, Psal. xviii, 14 : Intonuit de coelo Dominus, et Altissimus dedit vocem suam.

" Facta est, " quia corporalis fuit in qua Pater sonuit, ut a nobis esset audibilis. II Petr. I, 47 : Voce delapsa ad eum hujuscemodi a magnifica gloria,

" Tu es Filius meus. "

Testimonium est Patris. Et dicit duo : testimonium unius cum Patre divinitatis, et spirationis : et testimonium acceptabilis operis redemptionis.

In primo dicit : " Tu, " qui in carne videris esse humiliatus. Ad Philip. II, 7 : Semetipsum exinanivit formam servi accipiens.

" Es, " quod est nomen Dei ineffabile. Exod. III, 14 : Ego sum qui sum. Et, ibidem : " Qui est, misit me ad vos . " Filius meus. " Ecce deitatis cum Patre connaturalitas. Ad Philip. II, 6 : Cum in forma Dei esset, non rapinam arbitratus est esse se aequalem Deo. Joan. XI, 27 : Ego credidi quia tu es Christus, Filius Dei vivi, qui in hunc mundum venisti.

" Dilectus. "

Spiratio communis Patri et Filio, qua spirant Spiritum sanctum. Cum enim dicit : " Dilectus, " notatur dilectio procedere a Patre in Filium : et a Filio in Patrem, et in nos. Ad Coloss. I, 13 : Eripuit nos de potestate tenebrarum, ei transtulit in regnum filii dilectionis suae. Matth. iii, 17 : Hic est Filius meus dilectus.

" In te complacui. "

Acceptando opus meriti redemptionis. Tactus enim dolore cordis intrinsecus, poenituit me fecisse hominem : sed nunc commotio quievit : ad complacitum veni in. te, acceptando bonum tuum pro homine redimendo factum et faciendum : et in baptismo sanctifico et accepto redemptos. Ad Coloss. I, 19 et 20 : In ipso complacuit omnem divinitatis plenitudinem inhabitare, et per eum reconciliare omnia. Proverb. iii, 12 : Quasi pater in filio complacet sibi.''

Sic ergo terminatur pars in qua Leo de tribu Juda communicativus est suorum.

" Et statim Spiritus expetit eum in desertum. "

Hic ostenditur proprietas Leonis, qua imperterritus est in occursu contrapugnantiam. Proverb. xxx, 30 : Leo fortissimus bestiarum, ad nullius pavebit occursum. Demonstrat igitur vigorem in spiritu, et vigorem in corpore, et vigo" rem contra nequitias spirituales : et item super creaturas inferiores, et ad creaturam superiorem. Et haec quinque per ordinem dicit in Littera. Primum est devotionis : secundum est abstinentiae corporalis : tertium, virtutis et fortitudinis : quartum, inncoentiae et primae institutionis, et dignitatis : quintum, reverentiae et honoris. In his autem defecit primus homo. Primo enim, per elevationem (alias, elationem) quae surrepsit menti, spiritus amisit vigorem : et secundo, per appetitum vetiti, corporalis concupiscentiae sensit infirmitatem : tertio, per consensum succubuit tentatori : quarto, propter reatum, super ea quibus praepositus fuerat amisit dominium : et quinto, per exsilium ad quod damnatus fuit, Angelorum perdidit consortium.

De primo dicit :

" Et statim. "

Tangit autem spiritus in devotione impetum, et virtutem, et motum, et locum.

Impetum tangit cum dicit: " Et statim. " Ezechiel. I, 12 : Ubi erat impetus spiritus, illuc gradiebantur. Chrysostomus, super Joannem : " Magnum, " amor est, et igne vehementius : et " non est aliquid quod ejus proprium " impetum possit sustinere. " Job, xxxii, 19 : En venter meus quasi mustum absque spiraculo, quod lagunculas novas disrumpit.

" Spiritus "

Sanctus : qui est virtutis divinae vector, et invector. Psal. xxxii, 6 : Spiritu oris ejus omnis virtus eorum. Judicum, VI, 34 : Spiritus Domini induit Gedeon : et in illa fortitudine confudit et prostravit castra Madian. Et significatur quod congressuri cum diabolo, primo Spiritu Dei. in devotione sunt confirmandi.

" Expulit eum. "

Luc. IV,1, dicitur quod agebatur a Spiritu. Matth.IV, 1, quod ductus est : hic autem, quod expulsus. Agitur autem, cujus omnis actionis Spiritus est motor et principium. Ad Roman.VIII, 14 : Quicumque spiritu Dei aguntur, ii sunt filii Dei. Ducitur autem cujus omnem exitum et processum regit sapientiae Spiritus. Psal. cxlii, 10 : Spiritus tuus bonus deducet me in terram rectam. Expellitur autem, cujus impetus devotionis hominem non sin.it quiescere, nisi veniat ad Dominum. Psal. xv, 1, secundum translationem Hieronymi : " Serva me, Domine, quoniam in te speravi : et non mihi bene est sine te . " Psal. 4 et 5 : Si dedero somnum oculis meis et palpebris meis dormitationem :... donec inveniam locum Domino, Primum fit dono virtutis : secundum, gubernatione lucis : tertium autem, impetu charitatis. Cantic. viii, 6 : Lampades ejus lampades ignis atque flammarum,''

" In desertum. "

Locus est quieti silentii, ubi tumultus mentem non evocat. Osee, ii, 14 : Ducam eam in solitudinem, et loquar ad cor ejus. Thren. III, 28 : Sedebit solitarius, ei tacebit, quia levavit super se.

" Et erat in deserto quadraginta diebus et quadraginta noctibus, et tentabatur a Satana : eratque cum bestiis, et Angeli ministrabant illi. "

Tangitur abstinentia per quam restituitur vigor corpori membrorum, in primis parentibus per concupiscentiam perditus.

Circa hoc autem tangit duo : locum jejunii, et longitudinem.

Locum, cum dicit :

" Et erat in deserto, "

Ne putetur accessisse ad locum praeparati cibi. Psal. lxiv, 13 : Pinguescent speciosa deserti. Hinc primi Religiosi acceperunt quod ad desertum se transtulerunt : quia ibi nec deliciae proferuntur (alias, proponuntur), nec favor laudis, nec elatio tentare possunt. Jerem, ii, 2 : Recordatus sum tui, miserans adolescentiam tuam, quando secuta es me in deserto. Infra, VI, 31 : Venite seorsum in desertum locum, et requiescite pusillum,

" Quadraginta diebus. "

Et ne putetur noctibus comedisse addit : " Et quadraginta noctibus. " Numerus autem iste figuralis est paenitentiae, et effectus paenitentiae. Paenitentiae quidem, quia est decima anni: effectus autem paenitentiae, quia partibus suis surgit in quinquaginta, qui est accessus ad annum quinquagesimum Iubilaei, per quem signatur remissio perfecta. Hoc jejunium praefiguratum est in Moyse , et in Elia : perfectum autem a Christo. Moysen illuminavit ad legem intelligendam : Eliam ad Dominum evexit. Dominus autem jejunans a tentatore triumphavit. Et haec tria facit in nobis jejunium.