Quinquagena III.

101. O salutiferum

Devotae animae
Electuarium,

Iesu piissime,
Chaos pestiferum

Peccati reprime,
Quod premit miserum

Me nunc gravissime

102. Rex admirabilis

Plebis angelicae
Canentis iubilis

Tibi hymnidice,
Nos carnis vinculis

Solutos lubricae
Caelorum incolis

Clementer adice.
103. O inflexibilis

Amor paracliti,
Nexus amabilis

Patris et filii,
Purges a maculis

Carnalis vitii
Ovantes titulis

Huius obsequii.
104. Pax tuos muniens

Serena gratia,
Ab ipsis auferens

Culpas et vitia,

Corda sis uniens
A se discordia,

Amoris conferens
Illis donaria.

105. O sapientia

Te sapientium

Atque industria

Mentis quaerentium,

Solare tristia

Corda maerentium,

Te conscientia
Pura colentium.

106. Pacis principium,

Iesu, rex gloriae,
Eius binarium

Declarans varie,
Mentes discordium

Ducas plenarie
In foedus intimum

Verae concordiae.
107. Oriens splendide

Depellens tenebras,
Amore fervidae

Menti dans gratias,
Emunda sordidae

Meae spurcitias,
Virtutis candidae

Parans delicias.

108. O summa puritas

Atque munditia,
Quam universitas

Laudat industria,
Meas praeteritas

Noxas et vitia
Absolvat pietas

Tua et gratia.

109. O splendor gloriae

Patris ingeniti,
Eius potentiae

Par et paracliti,
Mundi fallaciae

Carnique dediti
Subdimur gratiae

Tuae ut subditi.

110. O esca solida

Et venerabilis,
Quam sapientia

Dat suis famulis,
Det sua gratia,

Ut fiam habilis
In conscientia,

Iustus et humilis.

111. O sol iustitiae

Accendens animam
Per donum gratiae

Ad paenitentiam,
Nostrae malitiae

Exsicca scoriam,
Plenae munditiae

Dans conscientiam.

112. O diligibilis

Deus permaxime
Et appetibilis

Devotae animae,
Amoris vinculis

Stringe fortissime,
Qui te his titulis

Collaudant intime.

113. Vitae principium
Et exsistentiae,
Fons et initium
Omnis prudentiae,

Mihi donarium
Da sapientiae

Ac tandem bravium
Aeternae gloriae.

114. Summa divinitas

Gubernans omnia,
Quae tua bonitas

Fecit vi propria,
Absolvat pietas

Tua et gratia
Adflictas animas

Vi purgatoria.

115. Ignis illuminans

Illustrabilia,
Amore concremans

Et ignibilia,
Corda sis renovans

Defectibilia,
Quae culpa excaecans

Fecit debilia.

116. Forma pulchrifica

Formarum omnium,
In mundi fabrica

Hac existentium,
Laudes gratifica

Te venerantium
Ducens ad caelica

Nos post exsilium.

117. O lapis caelice,

Qui nectis fortiter
Muros ecclesiae

Ac mirabiliter,
Tibi nos adice

Amicabiliter
Et ex te refice

Sacramentaliter.

118. O substantifica

Tis existentium,
In aula caelica

Terraque stantium,
Mentes iustifica

Te venerantium,
Quas culpa lubrica

Foedat et vitium.

119. O pax pacificis

Colenda laudibus
Choris angelicis

Et ab hominibus,
His te hymnidicis

Dictis laudantibus,
Praesta Seraphicis

Accendi ignibus.

120. Munimen stantium

Et manuductio,
Luce carentium

Illuminatio,
Esto praesidium

Tuo auxilio
Te venerantium

Hoc famulitio.

121. O pax amantibus

Desiderabilis,
Vere credentibus

Et sanctis angelis,
Mariae precibus

Et adminiculis
Nos iunge citius

Caelorum incolis.

122. Pater califica

In te vivificans,
Fili califica

Sapientificans,
Pneuma califica

In te sanctificans,
Virtus deifica,

Sis nos laetificans.

123. Factor omnipotens

Omnis factibilis
Servans et uniens

Naturae vinculis,
Absolve miserens

Nos a piaculis,
Quos cepit persequens

Hostis reticulis.

124. O forma deica,

Forma mirabilis,
Nec vi angelica
Comprehensibilis,

Aufer phantastica
Hostis terribilis

Et nobis caelica
Da tuis famulis.

125. Virtus vivifica

Diversa colligens,
Conectens civica,

In bono uniens,
Esto maestifica

Corda reficiens,
Quae vis Satanica

Molestat saeviens.

12G. O substantifica

Rerum maneries,.
Has vi deifica

Formans in species,
Meae aedifica

Mentis parietes,
Quos diabolica

Deiecit rabies.

127. Vitis fructificans

Vina suavia,
Agmina satians

Super caelestia,
Esto laetificans

Nos tua gratia,
Quos caro petulans

Gravat per vitia.

128. Vita vivifica,

Viva vivificans,
Ab his mortifica

Cuncta exterminans,
Quaeso, laetifica

Me, qui sum clamitans
Voce maestifica:

Sis mei miserans.

129. Amoris glutinum

Indissolubile,
Patrem et filium

Nectens fortissime,
Solve per vinculum

Amoris stabile
Meorum criminum

Chaos damnabile.

130. Lumen mirabile
Te intuentibus,
Intellegibile

Supernis civibus,
Superlaudabile
Te cognoscentibus,
Te praearoabile
Desiderantibus.

131. O summe genitor,

Qui unigenitum
Gignis, profiteor

Quem nostrum pretium,
Te mihi, deprecor,

Praebe propitium,
Qui nimis deprimor

Per multum vitium.

132. O suavissimum

Unguentum animae,
Inungens animum

Delicatissime,
Turbatum servulum
Ab hoste redime,
Qui vexat plurimum
Me et nequissime.

133. O unigenite

Summi principii
Ac dator inclite

Caelestis praemii,
Fac nos sollicite

Tui obsequii
Laudes ac debitae

In cunctis prosequi,

134. Amor deifice

Inexstinguibilis,
Mentes mitifice

In te qui stabilis,
Colentes melice

Te laudum titulis
In caelis adice

Beatis angelis.

135. Lumen illuminans
Lucis capacia,
Res bene ordinans
Cum providentia,

Corda vivificans
Sis tua gratia,

Quae motus sordidans
Necat per vitia.

136. O sapientia

Paternae gloriae,
Dans beneficia

Tuis largiflue,
Post transitoria

Huius miseriae
Duc nos ad praemia

Caelestis patriae.

137. O lux deifica

Lucens in superis,
Quam plebs angelica

Laudat in caelicis,
Nos munda lubrica

Culpa et ceteris,
Ne gens daemonica

Nos mergat inferis.

138. O invisibile

Lumen clarissimum
Et ineffabile

Linguis loquentium,
Investigabile

Menti prudentium,
Sed venerabile

Cordi credentium.

139. Lux admirabilis

Patris essentiae,
Dans dona singulis

Divinae gratiae,
Nos adminiculis

Tuae clementiae
Solvas a vinculis

Hostilis furiae.

140. Ens ineffabile

Linguis loquentium,
Manifestabile

Per formas mentium,
Sit acceptabile

Nostrum obsequium
Rationabile

Per exercitium.

141. O perfectissima

Causa viventium
In caeli regia

Hicque degentium,
Virtutes dissipa

Nos odientium
Et nos a latria

Tua trahentium.

142. Divine spiritus

Superamabilis,
Noster paraclitus

Qui vere diceris,
Nos legis penitus

Coapta regulis
Mundans divinitus

A culpae maculis.

143. O patris claritas

Cuncta illuminans,
O prolis veritas

Falsa exterminans,
O summa caritas

Perversa exsecrans,
Sis me, o trinitas,

Ad bonum ordinans.

144. O virtus unica

Substantialiter,
Verum triatica

Es personaliter,
Trisubstantifica

Impartibiliter,
Tamen triplifica

Es singulariter.

145. Vita omnipotens

Vivorum omnium,
Causa efficiens

Et seminarium,
Esto abiciens

Peccatum varium
Tuum inficiens

Stipendiarium.

146. Lux praesens omnibus

Tibi fideliter
Corde credentibus

Et integraliter,
Assis precantibus

Fiducialiter
Teque laudantibus

Hymnis hilariter.

147. Pax perfectissima

Et insolubilis,
Concordans infima

Cum caeli incolis,
Te precor intima

Mea scintillulis
Amoris concrema

Solvens a vinculis.

148. Pulchrum principium

Et pulchritudinis
Caelorum civium

Et mentis hominis,
Canenti canticum

Istius carminis
Largire gaudium

Beatitudinis.

149. Lumen de lumine,

Verbum et radius,
Iustos a crimine

Servans clementius,
Tuo micamine

Mundes interius
Hoc te in carmine

Laudantem crebrius.

150. Summa paternitas

Emundans omnia,
Filii veritas

Pandens mysteria,
Pneumatis caritas

Nos replens gratia,
O sancta trinitas,

Da caeli gaudia.