16. De Resurrectione Domini.

1. Tristis venit ad Pilatum
Pastoris discipulus,
Quem Joseph dudum parentes
Dixere cognomine.

2. Corpus petiit magistri
constanter et abiit,
Tollens munda crucifixum
involvens in sindone.
3. Locans novo in sepulchro,
quod sibi paraverat,
Posuit, quod et ingenti
mole clausit lapidis.

4. Tertia de quo resurgens
die, sicut dixerat,
Semet ipsum demonstravit
primum mulieribus.

5. Quibus dixit ad moerentes
pergere discipulos
Et eorum de vivente
confortare viscera.
6. Moestis postea in via
duobus apparuit,
Quibus coepit scripturarum
aperire gurgites.
7. Sciri comes ille docens,
quis esset, nec poterat,
Tantum panis est ab eis
fractione agnitus.
8. Et progressi invenerant
congregatos undecim
Et dixerunt, quod surrexit,
Christus, sicut dixerat.

9. Metu forte Judaeorum
clausis tandem foribus
Medium se praesentavit,
propheta ut tradidit.

10. Ego sum, nolite fiere,
carnem meam cernite,
Spiritus qua caret almus,
qui caret et ossibus.

11. Coepit isdem panis vitae
quaerere, quid manderet ;
Partem piscis obtulerant
atque mellis pabulum.

12. Cum jussisset coram eis
sumere reliquias,
Haec sunt illa verba, dicens,
quae locutus fueram.

13. Impleri quoque oportet,

quae propbetae dixerant,
Moyses atque psalmista
de me quod cecinerant.

14. Oportebat Christus quoque
pati et resurgere
Triduum post, introire
propriam in gloriam.

15. Ite, dixit, praedicate
cunctis indulgentiam,
Solymorum circa fines
sumite primordia.

16. Tunc sodales sunt gavisi,
se vidisse Dominum,
Gaudio gavisi valde
pacem laeti capiunt.

17. Ego vos sicut me pater
mitto sicut miserat,
Hoc cum dixit, insufflavit
spiritumque tradidit.

18. Quando gessit ista Christus
non erat hic Didymus,
Cui ceteri dixerunt,
se vidisse Dominum.

19. Ille ait: hoc non credam,
nisi manus videro
Et in latus crucifixi
mox digitum misero.

20. Fores clausae dies octo

postquam Christum viderunt,
Decem erant congregati
et Thomas undecimus.

21. Venit Christus pacem portans,
praebuit se medium
Et Thomam de crucifixo
confortat incredulum.

22. Mitte manum, tange latus,
sis fidelis, Didyme,
Felix erit, qui non vidit
et credere potuit.

23. Leva tenent piscatores
et piscis non capitur,
Litus tenet salvatorem,
a quibus non creditur.

24. Rete jam dixitque Jesus
ad sinistram pellite,
Dextram trahit laborantem,
quem laeva neglexerat.

25. Dedit nox auroram lucis,
Christus mox agnoscitur,
Pisciumque multitudo
vix ad tellus trahitur.

26. Docet Petrum de magistro
tunc ille discipulus,
Domini qui supra pectus
in coena recubuit.

27. Nudus erat Simon Petrus,
tunicam succinxerat,
Cui praebet mare viam,
navi fertur socius.

28. Gloria aeterno patri,
gloria sit filio,
Gloria vivificanti
sanctoque spiritui.