21. De sancto Gerulpho.

In 1. Vesperis.

Antiphonae.

1. Illuxit nobis hodie

Novae splendor laetitiae,

Dum fulget in ecclesia

Sancti Gerulphi gloria.

2. Ut vas electum caelitus

Virtutibus imbutus,

Terrena sprevit penitus

Caelestia secutus.

3. Post sanctitatis studium,

In quo [sanctus] praefloruit,

Ascendit ad martyrium,

Quod solum ei defuit.

4. Athleta fortis Domini

Processit proeliari,

Vicit, victori datum est

in caelis gloriari.

5. Eius praeclara merita

Pangamus laude debita,

Ut nos post mundi proelia

Ducat ad caeli gaudia.

R. Gerulphe, martyr nobilis,

Succurre tuis famulis

Et salva tuis precibus

Tuis intentos laudibus;

V. Qui laetamur cotidie

In laude tuae gloriae,

Per te sumamus praemia

Caelestis vitae gaudia.

Ad Magnificat.

A. O dilecte Deo,

nostri, Gerulphe, memento,

Acquirens nobis

aeternae gaudia lucis.

Ad Matutinum.

Invitatorium.

Ad iubilum vocis

iungamus cantica cordis

Et cum Gerulpho

iubilemus in aethere Christo.

In 1. Nocturno.

Antiphonae.

1. Gerulphus almis actibus

Ab annis puerilibus

In lege Dei sedulus

Dies egit cum noctibus.

2. Dum convenirent populi

Adversus sanctum Domini,

Solo fidens in Domino

Vicit eius auxilio.

3. De multis eum hostibus

Victorem fecit Dominus,

Addens eius victoriae

Donum perennis gloriae.

Responsoria.

1. Adest sacra sollemnitas

Sancti Gerulphi martyris.

Quem larga Dei bonitas

Summis ditavit gaudiis;

V. Ut mundum sol illuminat

Splendoris sui lumine,

Sic ornavit ecclesiam

Suo Gerulphus sanguine.

2. Hic puer ab infantia

Detestabatur vitia

Et intendit virtutibus,

Sicut praecepit Dominus;

V. Coronandus martyrio

Se mancipavit Domino

Et gratiosus exstitit

Tam Deo quam hominibus.

3. Frequentabat ecclesias

Devotionis gratia

Et sanctorum memorias

Cum magna reverentia,

V. Quos iam cum Christo noverat

Feliciter gaudere,

Illorum sanctis gressibus

Elegit inhaerere.

In 2. Nocturno.

Antiphonae.

1. Mirificavit Dominus

Electum suum famulum,

Quem dedicando martyrem

Mundo fecit mirabilem.

2. Scuto protectus gratiae

Palmam sumpsit victoriae,

Cui cessit in praemium

Caelestis benedictio.

3. Honoris excellentiam

Et sempiternam gloriam

Sumpsit martyr egregius

Cum civibus caelestibus.

Responsoria.

1. Hic sanctus inter homines

More non vixit hominum,

Nam peritura respuit

Solum secutus Dominum;

V. Flagrabat enim fortiter

Caelesti desiderio

Et blandimenta noxia

Fuerunt ei taedio.

2. Labentis mundi gaudia

Contempsit ut inania

Et reputabat frivolum,

Quidquid habebat terminum;

V. Quod mundus suasit dulciter,

Contempsit ille fortiter,

Nolens fallaci gaudio

Summo fraudari praemio.

3. Quis non sollemni studio

Dei miretur gratiam,

Qui sancto suo famulo

Talem donavit gloriam,

V. Gementem in exsilio

Eduxit de miseria

Et gloriosum martyrem

Laetum fecit in patria.

In 3. Nocturno.

Antiphonae.

1. Gerulphus, martyr inclitus,

Confisus est in Domino,

Per quem calcavit omnia,

Quae florent in hoc saeculo.

2. Quem fecit esse Dominus

Sine mortali macula,

Perduxit eius animam

In caeli tabernacula.

3. Magna fuerunt proelia,

Quae pertulit pro Domino,

Maiora tamen praemia

Mansura sine termino.

Responsoria.

1. Gerulphum sanctum martyrem

Devote veneremur,

Ut ad superna gaudia

Per ipsum sublevemur,

V. Qui Christum subsecutus est

In morte salutari,

In eius semper laudibus

Curemus gratulari.

2. Hic tiro sanctus Domini,

Virtutibus armatus,

[Hic] dimicabat fortiter,

Nam hostis est prostratus;

V. Hostis putabat vincere,

Sed ipse fuit victus,

Nam ad honorem martyris

Finitus est conflictus.

3. Qui prius, clarus exstitit

Ut nobilis persona,

Post martyr fulsit clarior

Cum aurea corona;

V. Eius orationibus

In terris protegamur,

Ut sempiternis gaudiis

In caelis perfruamur.

In Laudibus.

Antiphonae.

1. Ad laudes Domini

surgamus corde libenti,

Laetabundi de gaudiis

Gerulphi sancti martyris.

2. Iam cum laetitia

caelesti vivit in aula,

Quem vitae innocentia

Perduxit ad caelestia.

3. Ad Dominum vigilans

prima de luce cucurrit,

Ut videret dulcissimam

Virtutis eius gloriam.

4. Eius erat studium

semper benedicere Christum

Eiusque rei praemium

Gaudere in perpetuum.

5. Iam canit hic sanctus

Domino nova cantica laetus,

Quem semper totis viribus

Collaudet omnis spiritus.

Ad Benedictus.

A. Erexit nobis omnibus

Cornu salutis Dominus,

Quod est cum sanctis moribus

Vita Gerulphi martyris.

In 2. Vesperis.

Ad Magnificat.

A. O Gerulphe, martyr Christi,

Sicut mundo lux fuisti,

Sic et nobis sis lucerna,

Qua ducamur ad superna.