Acta Apostolicae Sedis - Commentarium Officiale26

et abscondita vita. Amabilem se ostendit erga sorores ac prompte Superiori-

bus obsequentem.

Caritas compulit eam ut se Domino offerret veluti victimam ac deside-

rium manifestaret ut fieret « viola humilitatis, rosa caritatis, lilium puritatis ».

Ex oratione incessanti atque devotione erga Eucharistiam et Virginem Ma-

riam vires hauriebat ut exemplari modo consecrationem Christo viveret. Ca-

ritate et aequo animo omnes iuvit, prudens in consiliis, sedula in sanctifica-

tionis mediis seligendis, fervens in propriis officiis servandis et evangelicis

propositis exercendis. Eminenti fortitudine innumeras pertulit tribulationes

magnaque incommoda a puerili quidem aetate. Totam prorsus vitam suam

gessit in condicione egestatis et paupertatis, de qua tamen ipsa numquam

conquerebatur. Humilitas praecipuam eius spiritualitatis constituit indolem.

Confidit semper Divinae Providentiae atque intuitum in bona caelestia

convertit ita ut, gravi forma phthisis affecta, sorori suae scripsit: «Dies mor-

tis meae pulcherrimus mihi erit ». Postquam vota religiosa « in articulo mor-

tis » nuncupavit, domum Patris caelestis migravit die XXX mensis Maii anno

MDCCCXCVII.

Propter diffusam famam sanctitatis Archiepiscopus Burdigalensis anno

MCMX Causam beatificationis et canonizationis incohavit per celebrationem

processus ordinarii. Processus quidem rogatoriales facti sunt Tornaci, Ve-

sunnae, Augustoriti et Gratianopoli. Rite peractis rebus iure statutis, co-

ram Venerabili Decessore Nostro Pio XII die XXII mensis Ianuarii anno

MCMLVII promulgatum est Decretum super virtutibus theologalibus, cardi-

nalibus iisque adnexis a Venerabili Serva Dei heroico in gradu exercitis.

Deinde Nos Ipsi per Decretum die XVI mensis Decembris anno MMVI datum

miraculum eiusdem intercessioni adscriptum comprobavimus. Denique

eam Beatae titulo honestandam decrevimus atque statuimus ut ritus bea-

tificationis Burdigalensi in urbe ageretur die XVI mensis Septembris inse-

quentis anni.

Hodie igitur Burdigalae de mandato Nostro Venerabilis Frater Noster

Iosephus S.R.E. Cardinalis Saraiva Martins, Praefectus Congregationis de

Causis Sanctorum, textum Litterarum Apostolicarum legit, quibus Nos

Venerabilem Servam Dei Mariam Caelinam a Praesentatione B.V.M.

(in saeculo: Ioannam Germanam Castang) in Beatorum numerum adscri-

bimus: