Acta Apostolicae Sedis - Commentarium Officiale704

facultate colloquendi de quaestionibus, quas homo in cotidiana vita oppetere

tenetur. Ipse Iesus conspicitur nobis sicut Ille qui venit ut vitam abundantius

habeamus (cfr. Io 10, 10). Hac de causa, maximopere adlaboremus oportet ad

monstrandum Verbum Dei, uti aperturam ad proprias quaestiones, uti

responsum ad proprias interrogationes, uti dilatationem ad proprios valores

ac simul uti impletionem propriarum exspectationum. Pastoralis Ecclesiae

ratio recte dilucidare debet quomodo Deus exaudiat necessitates hominis

eiusque clamorem. Sanctus Bonaventura ita asserit in suo opere Brevilo-

quium: « Status vero sive fructus sacrae Scripturae non est quicumque, sed

plenitudo aeternae felicitatis. Nam haec est Scriptura, in qua verba sunt

vitae aeternae, quae ideo scripta est, non solum ut credamus, verum etiam

ut vitam possideamus aeternam, in qua quidem videbimus, amabimus, et

universaliter nostra desideria implebuntur ».72

Cum Deo colloquendum per Ipsius verba

24. Divinum verbum unumquemque nostrum inducit in colloquium cum

Domino: Deus qui loquitur docet nos quomodo cum Ipso colloqui possimus.

Cogitatio sponte vertitur ad Librum Psalmorum, in quo Ipse nobis tribuit

verba quibus nos ad Eum convertere possimus, vitam nostram coram Eo in

colloquio gerere valeamus, sic ipsam vitam transformantes in motionem ad

Deum.73 In Psalmis enim invenimus contextam seriem sensuum, quos homo

experiri potest in propria exsistentia et qui sapienter sunt positi coram Deo;

hic enim exprimuntur gaudium et dolor, anxietas et spes, timor et trepidatio.

Simul cum Psalmis mens nostra vertitur quoque ad alios innumeros textus

sacrae Scripturae, quibus ostenditur quomodo homo ad Deum sese intendat

per precationem intercessionis (cfr. Ex 33, 12-16), per canticum iubilationis

ob victoriam (cfr. Ex 15), vel per lamentationem in propria missione exse-

quenda (cfr. Ier 20, 7-18). Ita verbum quod homo vertit ad Deum, ipsum

quoque efficitur Verbum Dei, tamquam confirmatio indolis dialogicae totius

christianae Revelationis 74 et universa hominis exsistentia fit dialogus cum

Deo qui loquitur et exaudit, qui vocat et mobilitat vitam nostram. Verbum

Dei hic revelat integram hominis exsistentiam sub divina versari vocatione.75

72 Prol., Opera omnia V, Quaracchi 1891, p. 201-202. 73 Cfr. Benedictus XVI, Allocutio Lutetiae Parisiorum ad viros culturae deditos apud Colle-

gium a Bernardinis (12 Septembris 2008): AAS 100 (2008), 721-730. 74 Cfr. Propositio 4. 75 Cfr. Relatio post disceptationem, 12.