22. De sancto Godehardo.

In 1. Vesperis.

R. Antistes quidam per visum
Ac nocte solis radium
Vidit infulgentem ori
Sancti patris Godehardi,

V. Et cum fulgore spiritum
Migrare vidit ad Deum.

Ad Magnificat.
A. Magnificet te Dominum
Coetus omnis credentium,
Qui exaltasti humilem
Godehardum pontificem,
Inter superna agmina
Digna sublimans gloria,
Cuius praecelsa merita
Nostra relaxent delicta.

Ad Matutinum.
Invitatorium.

Alleluia Deo

iucundum psallite melo,
In quo mirificus

praesul vivit Godehardus.

In 1. Nocturno.
Antiphonae.

1. Beatus vir Godehardus,
In lege Dei sedulus
Fructu laudabilis vitae
Suo refulsit tempore.

2. Constituit eum Deus
In speculum praesulatus,
Ut ipsius praeceptorum
Legem doceret populum.

3. Mirificatus a Deo
In hominum collegio,
Iam tum laetitia cordis
Quiete novatur pacis.

Responsoria.
1. Igne divino succensus
Venerandus Godehardus
Mundi sprevit laetitiam
Vitam quaerens perpetuam,
V. Propositum monasticum
Suscipiens et habitum.
2. Hinc sublimatum cathedra
Pontificali gratia,

Pastoris aeterni Dei

Suo praeposuit gregi,
V. Quia glorificantes se

Consuevit glorificare.
3. O celsi meriti virum

Et praesolem Deo dignum,

Cuius obferri visibus

Nequam refugit spiritus;
V. Vas relinquens, quod possedit,

Ad nomen eius tremuit.

In 2. Nocturno.
Antiphonae.

1. In benedictionibus
Tuis iustus recognitus,
Laetatur in te, Domine,
Nitens corona gloriae.

2. Tu Deus admirabilis,
Omni terrae laudabilis,
Tuo praelatum operi
Super caelos exaltasti.

3. Hic etenim rectus corde,
Confidens in te, Domine,
Montem virtutis ascendit
Et aequitatem dilexit.

Responsoria.

1. Partim leprosum puerum
Et partim paraliticum
Vivens adhuc in corpore
Curavit pontifex iste

V. Et infirmantes oculos

Per benedictos flosculos.
2. Hic transitus sui diem,
Sibi desiderabilem,
Longe prius praedixerat
Suisque nuntiaverat,

V. Sui laboris terminum,
Per spiritum propheticum.

3. Diuturnis languoribus
Contractus quidam rusticus
Huius sancti pontificis
Curatus est suffragiis

V. Alterque casu contusus
Trabis et debilitatus.

In 3. Nocturno.
Antiphonae.

1. Te decet hymnus, Domine,
Cuius electus munere
Sanctus Godehardus tuis
Inhabitat in atriis.

2. Iam felix cum sanctis tuis
Supernae domus incolis
Te collaudat regem regum
In saecula saeculorum.

3. Hic velut palma floruit
Et ut cedrus emicuit,
Nunc transplantatus caelicis
Floret vernans in atriis.

Responsoria,

1. Pauper quidam puerulus,
Fini vitae iam proximus,
Per huius sancti meritum
Obtinuit remedium,
V. Puella quoque per cuncta
Paene membra praemortua.

2. Caecus quidam diaconus
Ad tumbam praesulis huius
Per eius patrocinium
Amissum recepit visum

V. Diuque caeca femina
Per eius clara merita.

3. Laus et honor, Christe,
tibi vivens vir fuit iste,
Quem dilexisti,

per quem tibi complacuisti,
Hic sublimasti,

post haec super astra locasti;
V. Iustitiae zona

cinctus meritaque corona.

In Laudibus.
Antiphonae.

1. Sedem Deus a saeculo
Praeparavit sancto suo,
Quem dum virtute praecinxit,
Excelsum decorans fecit.

2. Cordis vocisque iubilo
Servite Deo Domino,
Cuius intravit confitens
Portas hic sanctus pontifex.

3. Ad te de luce vigilans
Teque, Deus, desiderans
Susceptus est a dextera,
Post quam adhaesit mens sua.

4. Beatorum sacerdotum
Chorus benedicat Deum
In sancto laudis iubilo
Tanti viri consortio.

5. Laudet omnis creatura
Dei nostri magnalia,
Per quem gaudet Godehardus
In sanctorum cubilibus.

Ad Benedictus.
A. Benedictus sit Dominus
Suorum pater et Deus,
Ad quem ascendit hodie
Praesul dignae memoriae
Dono suae pietatis
Directus in viam pacis.

In 2. Vesperis.
Ad Magnificat.
A. O magna Christi gratia,
Devote glorificanda,
Qui famulum suum multis
Glorificat miraculis,
Succurrens cunctis illius
Suffragia petentibus,
Cui laus sit et imperium
Per saecula saeculorum.