Acta Benedicti Pp. XVI 707

28. His in adiunctis in mentem revocare cupimus consuetudinem Mariae

cum Verbo Dei. Quod singulari efficacitate splendet in Cantico Magnificat.

Hic quodammodo intellegi potest quomodo Ipsa una fiat eademque cum

Verbo, et in illud ingrediatur; in hoc miro fidei Cantico Virgo Dominum

extollit ipso eius Verbo: «Magnificat illud - ut ita dicamus, eius animae quasi

effigies - sacrae Scripturae filis plane contexitur, filis scilicet Verbi Dei. Sic

manifestatur, in Dei Verbo eam vere esse sua in domo, inde sponte exeuntem

et illuc redeuntem. Per Dei Verbum loquitur et cogitat; Dei Verbum fit eius

verbum, atque eius verbum ex Dei Verbo oritur. Ostenditur praeterea eius

cogitationes cogitationibus Dei assimulari, eius voluntatem una esse cum Dei

voluntate. Cum Dei Verbo penitus imbuatur, ipsa Verbi incarnati Mater

fieri potest ».81

Praeterea, mentio quae fit de Matre Dei edocet nos quomodo actio Dei in

terrarum orbe nostram iugiter implicet libertatem, quoniam in fide Verbum

Dei nos transformat. Actio quoque nostra apostolica et pastoralis numquam

efficax esse poterit nisi a Maria discamus actione Dei in nobis plasmari:

« Maximi porro momenti est devote et amanter oculos convertere in Mariam

ut in speculum et exemplar fidei Ecclesiae, huius rei causa maxime, ut hodie

mutationem efficiamus tangibilem in relatione Ecclesiae cum Verbo, tam

in habitu auditus orantis quam in opera munifice pro missioni et nuntio

impendenda ».82

Si in Dei Matre contemplamur quandam exsistentiam a Verbo prorsus

plasmatam, detegemus nos quoque invitatos esse ad mysterium fidei ingre-

diendum, per quam Christus venit ut in vita nostra commoretur. Omnis

christianus credens, ut memorat sanctus Ambrosius, quodam sensu concipit

et generat Verbum Dei in seipso; si una est Mater Christi secundum carnem,

Christus tamen omnium fructus est.83 Itaque, quod Mariae accidit, unicuique

nostrum cotidie contingere potest in auditione Verbi et in celebratione

Sacramentorum.

81 Id., Litt. enc. Deus caritas est (25 Decembris 2005), 41: AAS 98 (2006), 251. 82 Propositio 55. 83 Cfr. Expositio Evangelii secundum Lucam 2, 19: PL 15, 1559-1560.