Dicit ergo :

" Et conversus vidi. ": Et pro quia : non enim potest videre aversus. Exemplum de Maria, Joan. xx, 16, quae conversa vidit Dominum, et cognovit, et dixit ei : Rabboni.

" Septem candelabra aurea, " id est, septem Ecclesias Asiae, vel Ecclesiam universalem quae per illas signatur. Et dicitur Ecclesia candelabrum aureum : quia lucens scientia, gratia pretiosa, patientia solida, obedientia ductilis, praedicatione sonora, perseverentia longa, fide Trinitatis fundata, quae est repleta septemplici Spiritus sancti gratia. Et nota : Dicit " aurea, " ad differentiam hypocritarum qui sunt deaurati pulchra conversatione, sed non aurei sanctitate vitae : vel ad differentiam illorum qui dicunt ore, sed non implent opere. Unde Glossa : " Si habes verbum in ore, sed non in opere, candelabrum es, sed non aureum. "

Et in medio septem candelabrorum aureorum, "

Id est, in medio Ecclesiae. Isa. XII, 6 : Exsulta, et lauda, habitatio Sion, quia magnus in medio tui Sanctus israel.

" Similem Filio hominis, " id est, Angelum gerentem personam Christi, et apparentem in forma hominis. Vel, " Similem Filio hominis, " Christum qui post resurrectionem fuit immortalis, et ideo non Filius hominis, sed ei similis appellatur : vel quia ignorantiam et peccatum non suscepit, sed in similitudine carnis peccati apparuit in natura et paena similis. Ad Roman. VIII, 3 : Deus Filium situm misit in similitudinem carnis peccati.

" Vestitum podere, et praecinctum ad mamillas zona aurea :

Caput autem ejus et capilli erant candidi tamquam lana alba et tamquam nix, et oculi ejus tamquam flamma ignis :

Et pedes ejus similes aurichalco, sicut in camino ardenti : et vox illius tamquam vox aquarum multarum. "

Hic incipit describere ipsum qui ei apparuit.

Et describit ipsum in quatuor. Primo, ab habitu. Secundo, a forma, ibi, v . 14 : " Caput autem ejus. " Tertio, a potestate, ibi , v . 16 : " Et habebat in dextera. " Quarto, a gloria, ibidem, " Et facies ejus. "