28. De sancto Georgio.

In 1. Vesperis.

Ad Magnificat.

A. Digne Deo martyr,

pater o venerande Georgi,

Suscipe servorum,

petimus, pia vota tuorum

Sintque tua Christo

prece commendata supremo.

Ad Matutinum.

Invitatorium.

Laude pia regi

coelorum conjubilemus,

Quo sua devicit

tormenta Georgius almus.

In Nocturno.

Antiphonae.

1. Laudibus hymnidicis

exsultet turba fidelis,

Laetentur cuncta

coeli gaudente chorea.

2. Coelica namque suo

congaudet curia Christo

Martyris eximii

celebrando festa Georgii.

3. Qui monitis parens

divinis mente benigna.

Respuit hunc mundum,

plenus virtute superna.

In Laudibus.

Antiphonae.

1. Martyre devictus

poenas vincente tyrannus

Mandat adesse magum,

valeat quo vincere sanctum.

2. Ritu daemonii

magico magus ecce vocatus

Pocula dat Christi

servo magicata fideli.

3. Cumque bibens martyr

persisteret ore priori,

Fiat nt in numerum,

magus orat, Christicolarum.

4. Sacra percepta

tandem baptismatis unda

Percussus gladiis

Anastasius astra petivit.

5. Artibus iratus

delusus rex Dacianus

Praecipit, ut subeat

vir simplex carceris antra.

Ad Benedictus.

A. Eximius Christi

ductus de carcere martyr

Orans cuncta rotae

gladiis tormenta paratae

Comminuit genibus

flexis nec vulnera passus.