27. De sancta Gudila.

In 1. Vesperis.

1. Festa refert annus

nobis votiva reclusus,

In quibus aethereum

conscendit Gudila regnum,
Hic Christo famulans,

illic secum modo regnans.

Ad Matutinum.
Invitatorium.
R egem caelorum
Voces collaudent cunctorum,
Qui Gudilam benignam
Caelestium mansionum
Fecit esse dignam.

In 1. Nocturno.
Antiphonae.
1. His festis mundus

labili sit honore iucundus,
Collaudans Gudilam
claris natalibus ortam.
2. Angelus egregium

praedixit virginis ortum
Tanto praeclarum,

saeculis quantum antea ra-
rum.
3. Haec igitur teneros

consumpsit virtutibus annos,
Reddens vota Deo
redolentia cordis ab imo.

In 2. Nocturno.
Antiphonae.
1. Nocte sub obscura

fusa ad Dominum prece pura,

Caelitus accensa
pergebat lampade laeta.

2. Ecclesias totis

venerabatur quoque votis,
Pectoris interna
facie cernendo superna.

3. O pia virgo, tuis

confer suffragia servis,
Ut tibi devoti

sint et in aethere noti.

In 3. Nocturno.

Antiphonae.

1. Gudila, virgo Dei,

caelestis iura triumphi
Semper habens animo

Christum servabat in imo.

2. Pauperibus mensas

Praebens velut altera Dorcas,
Ipsis concessit,

quaecunque potissima gessit.

3. Rex pie caelorum,

nunc suscipe vota tuorum
Et precibus Gudilae
delicta nocentia dele.