Acta Apostolicae Sedis - Commentarium Officiale712

methodis historicae investigationis inducendis. Peculiarem in modum

loquimur de binis Litteris Encyclicis Providentissimus Deus Summi

Pontificis Leonis XIII et Divino afflante Spiritu Summi Pontificis Pii XII.

Venerabilis Noster Decessor Ioannes Paulus II in memoriam revocavit

momentum horum documentorum in ambitu exegesis et theologiae,

recurrente celebratione sive centenariae sive quinquagesimae memoriae ab

earum respectiva promulgatione.101 Summus Pontifex Leo XIII per suum

interventum meritum obtinuit catholicam Bibliorum interpretationem

tuendi ab impugnationibus rationalismi, quin confugeret ad sensum

spiritualem ab historia seiunctum. Non refugens criticam scientificam,

diffidebat tantummodo « de sententiis praeconceptis quae scientia niti

appetunt, sed revera contendunt ut ex ipsorum campo scientia dolose

emergat ».102 Summus Pontifex Pius XII sua pro parte oppetebat incursus

propugnantium exegesim sic dictam mysticam, quae quemlibet aditum

scientificum reiciebat. Litterae Encyclicae Divino afflante Spiritu summa

utentes lenitate vitaverunt ne diffunderetur conceptus discidii inter

« exegesim scientificam » ad usum apologeticum et « interpretationem

spiritualem interno usui reservatam », affirmando tamen sive « pondus

theologicum sensus litteralis methodice definiti », sive pertinendi rationem

« determinationis sensus spiritualis ... ad ambitum scientiae exegeticae ».103

Tali modo utrumque documentum respuit « discidium inter humanum et

divinum, inter investigationem scientificam et aspectum fidei, inter sensum

litteralem et sensum spiritualem ».104 Postea hoc aequilibrium subsequenti

tempore declaratum est in documento Pontificiae Commissionis Biblicae

anni MCMXCIII: « Exegetae catholici, dum interpretationi dant operam,

minime obliviscantur ea quae interpretantur Verbum Dei esse. Eorum

munus non concluditur cum illi fontes distinguunt, cum formas describunt

vel processus litterarios explicant. Finis laboris eorum attingitur

tantummodo postquam sensum textus biblici tamquam actualis Verbi Dei

explanaverunt ».105

101 Cfr. Ioannes Paulus II, Allocutio habita I expleto saeculo a Litteris encyclicis Providentis-

simus Deus necnon L exeunte anno a Litteris encyclicis Divino afflante Spiritu foras datis (23

Aprilis 1993): AAS 86 (1994), 232-243. 102 Ibid., n. 4: AAS 86 (1994), 235. 103 Ibid., n. 5: AAS 86 (1994), 235. 104 Ibid., n. 5: AAS 86 (1994), 236. 105 Pontificia Commissio Biblica, L'interpretazione della Bibbia nella Chiesa (15 Aprilis 1993),

III, C, 1: Ench. Vat. 13, n. 3065.