QUAESTIO XVIII.

Quaeritur, in quibus signis bona Religio cognoscatur, et una melior altera iudicetur .

Item quaero: cum quaelibet Religio sibimet placeat et aliis se praeferat, quae sunt signa maxime,

in quibas bona Religio agnoscatur, et in quibus alia melior altera aestimetur?

Respondeo. Saepe in uno et in aliquibus praecellit unus Ordo alterum, ut iste in labore, alter in silentio, alius in abstinentia et in consimilibus: sed generaliter in istis agnoscitur, quis sit melior. Unde si in studio omnis virtutis ut communiter personae illius Ordinis ferventius et frequentius exercentur, maxime caritatis et humilitatis et internae devotionis, est bonum signum .

Secundum, si omnia vitia et scandala odio habent et sollicite cavent et occasiones peccatorum amputant et exstirpant et munditiam diligunt et conservant.

Tertium est, si boni apud eos diliguntur et foventur, et despectis aliis, in regimine animarum soli assumuntur, et per eos maxime gubernatur Ordo ; Ecclesiastici decimo nono : Qui negligit modica paulatim decidet.

Quartum, si a saeculari frequentia se subtrahunt et honores fugiunt , divitias non ambiunt et conformari huic saeculo tam in moribus quam in factis seu qualibet apparentia erubescunt.

Quintum, si damnum et iniurias illatas aut despectiones tacite sufferunt nec per querimonias vindicare se cupiunt, sed Deum omnium inspectorem attendunt, qui suos, cum vult, potest defendere, cum vero expedire eis noverit, permittit, eos pro altiori praemio tribulari, et patienter ferunt, donec placuerit Deo aliter ordinare.

Qui ista signa plenius habent Religiosi meliores sunt, et qui minus, sunt minus boni, et qui nihil, nihil sunt: qui etiam singulariter habet in se bonus est, etiamsi aliquando communiter non habentur .