De electionibus Ministrorum. Rubrica IX.

Cum secundum Regulam generalis Minister sit a Ministris provincialibus et Custodibus eligendus, ordinamus, quod ad electiones procedatur hoc modo. Electoribus congregatis die ad eligendum praefixa, primo invocata Spiritus sancti gratia, Disquisitores ad hoc assumti singulorum vota seorsum aliquantulum coram oculis omnium perquirant fideliter et conseribant ; ita quod singuli, antequam recedant ab eis, audiant, qualiter conscripserint vota sua. Quibus per ordinem conscriptis, statim in eodem loco, antequam Fratres discedant vel colloquantur ad invicem, publicent in medium quae conscripserunt. Quodsi divina gratia inspirante in unum aliquem concordaverint, illius electio firma est absque aliqua quaestione. Si vero in partes aequales se diviserint, ille in quem plures medietate omnium eligentium consenserint, ex vi talis electionis et praesentis constitutionis verus electus habeatur. Surgat tamen ex electoribus unus ad hoc deputatus et dicat : " In nomine Patris et Filii et Spiritus sancti. Amen. Ego, frater N., nomine meo et omnium nostrum eligo talem Fratrem in generalem Ministrum Ordinis nostri ". Quo facto statim incipiant: Te Deum laudamus.

: Circa provinciales Ministros eligendos similiter procedatur, excepto: Te Deum laudamus. Si vero, iterato huiusmodi scrutinio, quoties videbitur electoribus expedire, contigerit, quod nullus esset electus a maiori numero electorum, possint communiter compromittere in tres vel quinque Fratres idoneos et discretos, qui vice omnium de praeficiendo valeant providere.

Si vero generalem Ministrum mori contigerit , ante festum S. Michaelis, Minister, in cuius ministratione moritur, vel Vicarius, teneatur significare sine dilatione Ministris omnibus, quibus poterit, bona fide, ut in Pentecoste sequenti fiat Capitulum generale. Si vero post dictum festum decesserit, nuntietur nihilominus, ut dictum est, non tamen fiat generale Capitulum anno illo, nisi alias eodem anno debuerit celebrari, sed celebrabitur in sequenti, et hoc in illo loco vel Provincia, ubi ordinatum fuerat per generalem Ministrum celebrari. Minister vero Provinciae, ubi fiet Capitulum generale, potestatem habeat super alios in Capitulo coercendi eos in iis quae ad expeditionem Capituli pertinent, quousque electus sit generalis Minister, si fuerit praesens electus, si vero absens, Minister Provinciae, ubi fiet Capitulum, assumtis secum duobus Ministris, uno transmontano et alio cismontano, de se ipsis vel aliis de uno provideant Ministro, qui super alios usque ad finem Capituli habeat potestatem. Quod etiam intelligimus, quandocumque alia de causa praedicto Capitulo Generalis non poterit interesse.

Ordinamus, quod Ministri provinciales, convocato provinciali Capitulo, a subditis eligantur, confirmandi per generalem Ministrum. Electores autem Ministrorum provincialium, postquam ad Capitulum convenerint, eligant praecise in die sequenti: ipsos tamen non oportet includi. Quodsi ipsa die non elegerint, ex tunc eis generalis Minister provideat de Ministro. Possit autem Minister provincialis eligi de toto Ordine. Quodsi, provinciali Capitulo congregato, Ministrnm provincialem mori contigerit vel absolvi, possint Fratres in eodem provinciali Capitulo congregati alium sibi eligere in Ministrum, quamquam ad hoc missi non fuerint vel vocati. Si vero electores praefati in eligendo non convenerint, possint et debeant Provinciae de Vicario providere. Si autem, mortuo generali Ministro, aliquem provincialem Ministrum mori contigerit, et alium eligi; statuimus, ut per Ministrum Provinciae vicinioris loco Capituli, in quo electio celebrabitur, et per duos Custodes eiusdem Provinciae, similiter viciniores, electione et electo legitime examinatis et approbatis, electus confirmetur. Electus vero et Fratres, qui propter examinationem electionis et electi a praedictis Ministro et Custodibus fuerint vocati, eisdem in omnibus, quae ad examinationem et confirmationem pertinent, teneantur firmiter obedire.

Custos vero, in cuius Custodia moritur Minister provincialis, postquam sibi de morte Ministri constiterit, certo die praefixo, in quo possit commode convenire Capitulum provinciale, teneatur, quanto citius poterit, convocare, nisi propinquus fuerit terminus provincialis Capituli celebrandi. Custos vero illius Custodiae, in qua Capitulum celebrabitur, tenebit Capitulum, quousque Vicarius sit electus. In quo Capitulo, facta electione provincialis Ministri, instituatur Vicarius de consensu maioris partis Capituli, quousque Minister in Provincia habeatur. Qui taliter institutus Fratres non mittat extra Provinciam ad manendum nec aliquos recipiat in sua Provincia moraturos. Item, Fratres non transeant de una Custodia in aliam ad manendum, nisi evidens necessitas vel communis utilitas hoc requirat ; et hoc de conscientia Custodum illorum, si fieri potest bono modo.

Item, non privet Custodiam vel locum vel Fratrem libris vel rebus aliis nisi ex causa urgente cum Fratrum loci consilio Discretorum.

De Custodibus autem et Guardianis provideatur in hunc modum. Minister provinciaus in Capitulo provinciali cum consilio et assensu Definitorum, et requisito consilio Fratrum de Custodia in Capitulo existentium, Custodiae provideat de Custode. Quodsi ante provinciale Capitulum contigerit mori Custodem aliquem vel absolvi, Minister, requisito consilio sex Discretorum ad minus de Custodia, eidem Custodiae provideat de Custode.

Item, Minister in provinciali Capitulo cum consensu et consilio Definitorum, et requisito consilio Custodis et aliquorum Fratrum locis conventualibus provideat de Guardianis. Quodsi ante Capitulum provinciale Guardianum aliquem conventualem mori contigerit vel absolvi: si Minister ad locum illum commode accedere poterit, requisito aliquorum Discretorum de conventu eodem consilio, de Guardiano illi loco provideat. Conventum autem dicimus, ubi tredecim Fratres et supra possint continue commorari . [Si vero Guardianum non conventualem mori post Capitulum provinciale contigerit, Custos, requisito consensu Ministri, si est in Custodia, provideat illi loco de Guardiano; ne tamen illum amoveat sine Ministri licentia speciali] In locis autem non conventualibus Custos quilibet in sua Custodia Guardianos instituat, aliquorum loci consilio requisito: non tamen ipsos amoveat sine Ministri licentia.

Nullus praeficiatur in officio Fratrum, nisi qui possit ducere communem vitam, quae tam a praelatis quam a subditis observetur, maxime in vestimentis, cibis et lectis.