Oratio prooemialis.

1. Illibatae matris nate,
Fili Dei, precor, mei

Cordis munda latebram,
Ut aperte et diserte
Mente tota et devota

Hymnos tuos proferam.

2. Heli, heli, rector caeli,
Nos attende et accende

Me superna gratia,
Nam sincero corde quaero
Tibi ferre et offerre
Laudum sacrificia.

3. Eruditum et munitum
Tuae legis, qua nos regis,

Fac me per eloquium,
Quo timore et amore
Possim tui semper frui

Per hoc soliloquium.

4. Suspirantem et clamantem
Ad te Deum audi reum

Solita clementia,
Confer statum, sed signatum
Signo crucis, hostis trucis
Servans a saevitia.

5. Uas honoris, mors erroris,
Opto nimis, ut imprimis

Tui des memoriam,
Ut decenter et frequenter
Puro corde sine sorde

Tuam cantem gloriam.

6. Splendor patris, honor matris,
Ob insigne tuum digne

Nomen fac me strenue
Te laudare, praedicare,
Ut finita carnis vita

Gaudeam perpetue.