32. De sancto Henrico.

In 1. Vesperis.

Antiphonae.

1. Gaude, coetus fidelium.

Henrici natalitium

Laetis extollens canticis,

Qui intravit in gaudium

Per insigne martyrium

Choris insertus caelicis.

2. Ornamentis decoratus

Virtutum vir inditus

Upsalensis praesulatus

Plebem rexit primitus.

3 Sanctus Ericus dulciter

Rex praesulem dilexit,

Quem Domino fideliter

Ministrare conspexit.

4. O quam felix, ecclesia,

Hoc patre spiritali,

Quam felix eras, Suecia,

Regi subiecta tali.

5. Hos patronos pariter

Laeti veneremur,

Ut cum his perenniter

In caelis collaetemur.

Ad Magnificat.

A. Gloriosum pontificem

Henricum, post multiplicem

Virtutem, qua refloruit,

Per mortem, quam stustinuit

Victorem vexit hodie

Christus in templum gloriae.

Ad Matutinum.

Invitatorium.

Exsultemus in Henrici

Sacro natalitio,

In quo laudes Deo dici

Condecet in gaudio.

In 1. Nocturno.

Antiphonae.

1. Sanctum Ericum comitans

Sanctus praesul Finlandiam

Adivit, illic militans

Bonam Christi militiam.

2. Doctrinam evangelicam

Annuntians gentilibus,

Patenter viam caelicam

Demonstrabat errantibus.

3. Ut Christo lucrifaciat

Gentes idolatrantes,

Non timet, ne inveniat

Multos se tribulantes.

Responsoria.

1. Omnes gentes iubilate,

Deo caeli exsultate,

Gaudeat Finlandia,

Laeti Deum collaudate

Et Henrici celebrate

Laeta natalitia.

V. Hic effulsit honestate

Morum, verbi veritate

Vitae sanctimonia.

2. Sanctus cuiusdam impii

Redarguit saevitiam,

Ut reus homicidii

Subiret paenitentiam

Et paenitens flagitii

Consequeretur veniam,

V. Qui salubris remedii

Sprevit infelix gratiam.

3. Impaenitens malitiae

Vir sanguinum ecclesiae

Despecta disciplina

In ministrum iustitiae

Ferox furit et rabie

Occidit hunc ferina;

V. Sic cum palma victoriae

Praesul intravit hodie

Palatia divina.

In 2. Nocturno.

Antiphonae.

1. Pastor bonus veraciter

Curam gregis dominici

Gessit perfectibiliter

In labore multiplici.

2. Affectu devotissimo

Crebra cum instantia

Offerebat altissimo

Precum sacrificia.

3. Suum Deus exaudivit

Devotum precatorem

Et a malis custodivit

Suum verum cultorem.

Responsoria.

1. Birretum patris incliti

Occisor suo capiti

Protervus imponebat,

Quod dum vellet amovere,

Carnes illi cohaesere

Et eas amovebat;

V. Ursus, quem se prostravisse

Retulit et peremisse,

Sic eum remordebat.

2. Annulum et digitum

Longe diu post obitum

Insignis viri Dei

Ostendit avicula

Iacentem in particula

Cuiusdam glaciei;

V. Dum sacrae reliquiae

Iacuerunt in glacie,

Calor non nocet ei.

3. Imitator salvatoris

Vigilanter populis

Veram fidem creatoris

Praedicans incredulis,

Ut praeclari sol fulgoris

Lucem dedit saeculis.

V. Glorioso iam laboris

Fructu gaudet et honoris

Insignitur titulis.

In 3. Nocturno.

Antiphonae.

1. Cum lucri magnitudine

Servus fidelis gratiae

Reddens data talenta,

In pacis pulchritudine

Collocatur et requie

Potitur opulenta.

2. Perfecte desiderium

Sui cordis adeptus,

Ad caelos per martyrium

Migrat malis ereptus.

3. Servum pater familias

Inventum vigilantem

Ad aeternas delicias

Induxit triumphantem.

Responsoria.

1. Praeclari patris sanctitas

Doctrinam fructuosam

Vitaeque virtuositas

Reddebat gratiosam

Et mortem monstrat claritas

Signorum pretiosam,

V. Nunc praestat illi deitas

Coronam gloriosam.

2. O vita commendabilis,

O mors desiderabilis,

Propter quae venerabilis

Hic pontifex fit similis

In gloria sanctorum,

V. Commenda nos, amabilis

Pater et honorabilis

Martyr, rego caelorum.

3. Martyr iste militavit

Christo, per quem triumphavit,

Triumphando reportavit

Finem, pro quo desudavit

Coronam iustitiae;

V. Felix cursum consummavit,

Qui pro fide, quam servavit,

Fulget stola gloriae.

In Laudibus.

Antiphonae.

1. Multitudo languentium

Restituta saluti

Fidele testimonium

Dat martyris virtuti.

2. Longo dolore capitis

Frater Minor gravatus

Mox voto facto meritis

Est praesulis curatus.

3. Depulsa caligine

Longae caecitatis

Visum reddit feminae

Pater pietatis.

4. Fluctuum saevitie

Nautae conquassati

Sancti beneficia

Praedicant salvati.

5. Dum devotis poscitur

Precibus cupitam

Defunctis asseritur

Rediisse vitam.

Ad Benedictus.

A. Christi pugil eximius

Et pontifex egregius

In hac die caelestia

Triumphator ad gaudia

Introivit feliciter

Deo fruens perenniter.

In 2. Vesperis.

Ad Magnificat.

A. Christe, virtus pugnantium,

Corona triumphantium,

Nos praesens post exsilium

Henrici per suffragium

Perduc ad perpes gaudium,

Quo tecum semper omnium

Gaudet coetus fidelium.

3. De sancto Hieronymo.

In 1. Vesperis.

Ad Magnificat.

A. O Christicolarum lux

Dux, vas abstinentiae,

O scripturarum vigor

Rigor paenitentiae,

Eremitarum forma,

Norma continentiae

Sacerdos felicissime,

Lucens ardensque lucerna,

Hieronyme clarissime,

Nos tuere, nos guberna.

Ad Matutinum.

Invitatorium.

Voto, voce Dominum,

Venite, adoremus,

Vocantem Hieronymum

Ad astra collaudemus.

In 1. Nocturno.

Antiphonae.

1. Literis Hebraicis

Graecis et Latinicis

Eruditus satis,

Insignitur moribus,

Fulcitur honoribus

Mirae dignitatis.

2. Cardinalis presbyter

Atque mirabiliter

Doctor divulgatur,

Summo sacerdotio

Populi devotio

Dignum hunc testatur.

3. Carnis dum spurcitias

Clerique malitias

Dure reprobavit,

Insanis invidiis,

Vesanis insidiis

Cedens exsulavit.

Responsoria.

1. Tractus ad tribunal iudicis,

Caesus flagellis tartaricis,

Sectis cassis Ciceronicis,

Dictis promittit veridicis

Verbis haerere Dominicis.

V. Mox dulcescit fulgidus

Scripturae sacrae vultus,

Cuius sermo rigidus

Horrebat ut incultus.

2. Speculator evangelicus

Montem scandit doctor mysti-

cus,

Pugil fidei magnificus,

Felix conversator caelicus,

Divino gustu famelicus.

V. Ad atria superna

Hieronymus aspexit,

Quem caritas superna

Quam crebro sursum vexit.

3. Mundi splendor, Christi facula,

En, propinat vitae pocula,

Contra saevos tendit iacula

Per fidei propugnacula,

Purgans haeresis piacula.

V. Nam verbum veritalis

Hieronymus efflavit

Dogmaque falsitatis

Asperrime damnavit.

In 2. Nocturno.

Antiphonae.

1. Iam deserti speciosa

Vernantius pinguescunt,

Arta, cruda dum spinosa

Hieronymo dulcescunt.

2. Ferarum non hominum

Hieronymo spectaculum,

Amarum ac horridum

Placebat habitaculum.

3. Dulcem pastum frutices

Arbustaque dederunt,

Aquam sibi latices

Potandam praebuerunt.

Responsoria.

1. Pannis raro libuit,

Coctum quid abhorruit

Doctor mente pura,

Mollis stratus viluit,

Nunquam vinum licuit

In hac vita dura,

Sibi nam displicuit

Omnis creatura;

V. Totum mentis oculum

In Christum plene fixit

Et amoris radium

Ad ipsum plane flexit.

2. Pelli consumptis carnibus

Totisque lassis viribus

Ossa cohaeserunt,

Usta solis ardoribus

Onustaque laboribus

Membra palluerunt,

Nec sanctum a rigoribus

Haec relaxaverunt.

V. Vasta solitudo

Hieronymum nutrivit,

Victus artitudo

Corpus exinanivit.

3. Ossa dum cute squalida

Operta tabescebant,

Complosione valida

Fragore strepebant,

Christique laudem pallida

Sic membra resonabant.

V. Uberrimis se lacrimis

Cotidie rigavit,

Acerrimis ieiuniis

Se sanctus maceravit.

In 3. Nocturno.

Antiphonae.

1. Acta paenitentia

Bethlehem meavit

Et cum diligentia

Fratres adunavit.

2. Coepitque sincerius

Scripturis inhiare,

Carnem tunc uberius

Non cessans subiugare.

3. Corpus de Chaldaico

Simul et Hebraico

Transtulit scripturae

Sanctus hic Hieronymus,

Quem laudandum ponimus

Omni creaturae.

Responsoria.

1. Leo Deo disponente

Transit ad monasterium,

Caesus, laesus planta sente

Precatur adiutorium,

Hospes sospes fit repente

Per fratrum beneficium,

Paratus ad obsequia.

V. En, ad te confugiens

Te nostra mens implorat,

Cui leo rugiens

Oboedit et adorat.

2. Agonizat Christi miles

Miro pugnans certamine,

Perfidorum caeli heres

Diro pressus gravamine,

Falsum dogma Deo dives

Duro fugat certamine

Claro fultus dictamine.

V. Dum scripturis insudavit,

Doctor quantum laboravit,

Non lingua valet dicere,

Sed neque mens conicere.

3. Haec est arca testamenti,

Doctor legis et translator

Fidelis in officio,

Vivus lapis fundamenti,

Quem et mundi fabricator

Quadravit aedificio;

Tuo, fidei zelator,

Nos muni beneficio,

V. Ad te flentes suspiramus,

Pater sancte, pie, bone,

Supplices te flagitamus,

Magne doctor et patrone.

Ad Laudes.

Antiphonae.

1. Psalle, mater ecclesia,

O psalle plena laude

Hieronymi sollemnia

Decantans et adplaude.

2. Rigat montes rore vitae

Totam terram satiante,

Huius vita coenobitae

Cum doctrina fecundante.

3. Haereticorum faciem

Velociter confundit,

Quorum ferocem aciem

Atrociter retundit.

4. Inter flagella corporis

Dat Christus dulce suavium,

Sed post duella temporis

Donat aeternum bravium.

5. Iucundare, plebs fidelis,

Nam doctor Christi gremio

Iam suscipitur in caelis

Celso ditatus praemio.

Ad Benedictus.

A. O lampas ecclesiae,

Iubar singulare,

Doctor sapientiae

Decusque salutare,

Inclite Hieronyme,

O doctor Deo care,

In lacu miseriae

Nos regere dignare.

In 2. Vesperis.

Ad Magnificat.

A. Victor migrat laetabundus

Ad regnum post miserias

Christi mensus vestigia,

Quam beatus, quam iucundus

Intrat ad regni nuptias

Mira pandunt prodigia,

Eia, ergo totus mundus

Petat fundendo lacrimas

Tanti patris suffragia.

in 1. Vesp. ad Magn. die folgende A:

O gloriose Hieronyme,

Doctor Christi eximie,

Qui in terris adhuc positus

Gloriam Dei intuitus,

Nam saepe angelorum

Choris interfuisti,

Nil sentiens de corporeis,

Sicut tu scripsisti;

Ergo, pater sancte,

Qui tanta meruisti cernere,

Precamur suppliciter,

Perduc nos illuc feliciter.