Acta Apostolicae Sedis - Commentarium Officiale722

extollitur contra omne genus iniustitiae et violentiae, communis vel singula-

ris, et hoc instrumentum est educationis quod Deus suo populo tradidit,

tamquam praeparationem ad Evangelium. Quapropter erroneum est eos

praetermittere locos sacrae Scripturae, qui nobis afferunt difficultates. Potius

conscii simus oportet harum paginarum lectionem exigere ut congruentem

acquiramus peritiam per formationem quae textus explanet in eorum con-

textu historico-litterario et in prospectu christiano, « cuius maxima velut

clavis interpretatoria Evangelio et novo Iesu Christi mandato constat in

Paschatis mysterio impleto ».140 Quapropter hortamur doctos viros et pastores

ad iuvandos fideles omnes ut accedant ad has quoque paginas per lectionem

quae earum significationem sub luce mysterii Christi manifestet.

Christiani et Hebraei coram Sacris Litteris

43. Artas si perpendimus necessitudines quae Novo Testamento cum

Vetere intercedit, sponte nunc mentem vertimus ad peculiare vinculum quod

emergit inter Christianos et Hebraeos, vinculum nullo umquam tempore

obliviscendum. Summus Pontifex Ioannes Paulus II asseruit Hebraeis: vos

estis « ''fratres nostri praedilecti'' in fide Abrahae, nostri patriarchae ».141

Haec affirmatio profecto non significat retractationem discidiorum quae in

Novo Testamento declarantur quoad Veteris Testamenti institutiones, nec

minore ratione quoad consummationem sacrarum Scripturarum in mysterio

Iesu Christi, qui probatus est tamquam Messias et Dei Filius. Attamen haec

alta et absoluta differentia mutuam inimicitiam haudquaquam implicat.

Exemplum sancti Pauli (cfr. Rom 9-11) ostendit e contrario gestum reveren-

tiae, aestimationis et amoris erga populum Hebraicum solum esse gestum

vere christianum hac in condicione quae ad Dei consilium, plane positivum,

mysteriose pertinet.142 Paulus enim affirmat de Hebraeis: « Secundum electio-

nem autem carissimi propter patres; sine paenitentia enim sunt dona et

vocatio Dei! » (Rom 11, 28-29).

Sanctus Paulus pulchram praeterea adhibet imaginem arboris olivae qua

describit artiores necessitudines inter Christianos et Hebraeos: definit Eccle-

siam Gentilium tamquam virgultum oleastri, insertum in arborem bonae

140 Propositio 29. 141 Ioannes Paulus II, Nuntius ad Rabbinum Principem Romae (22 Maii 2004): Insegnamenti,

XXVII,1 (2004), 655. 142 Cfr. Pontificia Commissio Biblica, Il popolo ebraico e le sue sacre Scritture nella Bibbia

cristiana (24 Maii 2001), 87: Ench. Vat., 20, n. 1150.