312 Acta Apostolicæ Sedis - Commentarium Officiale

PLACENTINA IN HISPANIA

Beatificationis et Canonizationis Servi Dei Eladii Mozas Santamera Sacerdotis

Dioecesani Fundatoris Instituti Sororum Iosephinarum a SS. Trinitate (1837-1897)

DECRETUM SUPER VIRTUTIBUS

« Super omnia autem haec: caritatem, quod est vinculum perfectionis »

( Col 3, 14).

Eladium Mozas Santamera, Dei Famulum, Apostoli monitum sincere

ac libenter observasse, facili negotio cum ex integro eius vitae cursu tum

ex mirabili eius animi casu concluditur. Nihil enim habuit antiquius quam

principatum caritatis adserere, qua duce in omnibus rerum adiunctis ad

evangelicae perfectionis fastigium totis viribus citatoque gradu contendit.

Hic Dei Famulus in pago vulgo Miedes de Atienza, dioecesis Seguntinae,

haud procul Guadalaiara in Hispania, die 18 mensis Februarii anni 1837

natus est et paulo post quam mortalis huius vitae lucem aspexit lustrali est

sacri fontis aqua expiatus. Fuit eius domus Christianae legis studiosissima,

utpote amplius decem presbyteris aucta, eaque patre Iosepho chirurgiam

exercente modice locuples. Quem tamen trimestris amisit Eladius. Itaque,

Monica matre ductante, ad sacerdotem avunculum primum, deinde vero,

eo demortuo, Seguntiam migravit, ubi tandem illa ad secundas nuptias cum

viduo transiit.

Interea haud obscuris indiciis persenserat Eladius sese divinitus ad sacra

capessenda munia vocari. Itaque undecim annorum puer arduum institutio-

nis sacerdotalis iter volenti animo arripiens, in Seguntino seminario, Sancto

Bartholomaeo dicato, extrinsecus primum, deinde in numerum discipulorum

ascitus impigram studiis operam dedit; ibique tantum progressum fecit tan-

taeque pietatis evasit, ut eodem die quo decimum sextum aetatis annum

complebat ad primam tonsuram sit promotus; qui ceterum paucis post annis

Latinitatis simul et humanarum disciplinarum praeceptor renuntiatus est.

Attamen interea diutino gravique morbo anno 1857 absumpta est mater;

cui piissime ille, ut filium addecet, usque ad ipsam mortis colluctationem

adsederat. Deinde Matritum se contulit, ubi praelectionibus de theologia