Continua sic: Commendavi bona quae in te sunt, sed nunc redarguo mala.

Unde ait: " Sed habeo adversum te, " id est, adversus tuos malos subditos qui tecum sunt, pauca scilicet reprehensione digna. Peccata enim subditorum Praelatis imputantur, quando corrigere negligunt.

" Quod charitatem tuam, " id est, ad tuam utilitatem tibi datam, "primam reliquisti, " id est, tui subditi charitatem quam prius habuerunt, reliquerunt per tuam negligentiam. Unde propter peccata subditorum frequenter punitur Praelatus. Unde Glossa hic : " Heli sacerdos bonus, et tamen damnatus, quia filios corrigere noluit. "

Aliter exponitur de Episcopo sic : " Sed habeo adversum te, " pauca scilicet reprehendenda. Nota ordinem : Prius commendavit, modo increpat: in quo dat nobis exemplum ut si volumus aliquem emendare, prius debemus bona sua commemorare.

" Quod charitatem tuam primam, " scilicet fervorem tuae primae charitatis qua fervebas contra malos ipsos persequendo, " reliquisti " torpendo : unde praedicationi non insistebat. Sic fiunt aliqui modo tepidi in fine, qui in principio ferventes fuerunt, similes statuae Nabuchodonosor quae habuit caput aureum, pectus argenteum, pedum pars quaedam fuit ferrea, quaedam fictilis i. De his, ad Galat. III, 3 : Sic stulti estis, ut cum spiritu coeperitis, nunc carne consummemini ? etc.

" Memor esto itaque unde excideris: et age paenitentiam, et prima opera fac. "

Hic invitat eum ad paenitentiam per bonorum praeteritorum recordationem, a quibus declinaverat.