42. De Poenitentia.

1. Ad te, Deus gloriose,

rerum factor omnium,
Lacrimosis clamo gemens

et amaris vocibus:
Poenitenti, Christe, da veniam.
2. Brevis est haec vita nimis

Et plena miseriis,
Quam secutus ad coelestem

non levavi animam.
Miserere mei, piissime.
3. Confundor et erubesco

ante tuam faciem,
Cum recordor, quanta feci

coram te peccamina.
Ab inferno, Christe, nos libera.

4. Delectatus voluptate
carnis vixi reprobe,

Non quaesivi voluntatem
tuam digne facere.

Poenitenti, Christe, da veniam.

5. Epulando resolute
me nefandis pollui,

Deceptoriis et blandis
corpus meum subdidi.

Miserere mei, piissime.

6. Feci malum plus quam omnes

viventes in saeculo,
Unde tuum supplex posco

jam, Deus, auxilium.
Ab inferno, Christe, nos libera.
7. Gloriosam majestatem

et tuam potentiam
Collaudant, adorant cuncti,

quam tremunt, archangeli.
Poenitenti, Christe, da veniam.
8. Haec est via nam salutis,

te Deum cognoscere,
Te pro malis exorare

unumquemque propriis.
Miserere mei, piissime.
9. Justus es judex et pius

et rectum judicium,
In furore tuo, precor,

ne me, Deus, arguas.
Ab inferno, Christe, me libera.

10. Karo omnis ad examen

veniet terribile,
Ubi justi exsultabunt

et moerebunt impii.
Poenitenti. Christe, da veniam.

11. Luctu plena dies illa

et amara reprobis,
Dies irae, dies illa,

dies et caliginis
Miserere mei, piissime.
12. Moeror gravis homicidas

et raptores plurimos,
Ebriosos atque molles

occupabit pariter.
Ab inferno, Christe, me libera.

13. Non superbi ac discordes,

odiosi, lubrici,
Detractores et mendaces

diem hanc effugient
Poenitenti, Christe, da veniam.
14. Obstupebunt et marcescent

omnes illic invidi,
Concremabit et avaros

ultrix flamma divites.
Miserere mei, piissime.
15. Plectet ignis duros corde

et tempestas valida,
Justi autem laetabuntur

coram summo judice.
Ab inferno, Christe, me libera.
16. Qui ex tota mente sua

dilexerunt Dominum,
Hi gaudentes conregnabunt

illi in perpetuum.
Poenitenti, Christe, da veniam.
17.Rex et dicet: maledicti,

ite vos in tartarum ;
Sanctis vero: benedicti,

venite ad gloriam.
Miserere mei, piissime.

18. Sic clauduntur tenebrosi

peccatores carcere
Et ardebunt ut damnati

cum stridore dentium.
Ab inferno, Christe, me libera.
19. Tunc electi ad promissam

ibunt laeti patriam,
Ubi vitam sempiternam

habebunt cum angelis.
Poenitenti, Christe, da veniam.

20. Vita illa Deus erit,
pax atque securitas,
Quem videbunt congaudentes
facie ad faciem.
Miserere mei, piissime.

21.Xriste, rerum fabricator

et redemptor omnium,
Suscipe vocem clamantis

ad te, quaeso, valide.
Ab inferno, Christe, me libera.
22. Ymnos tibi ut acceptos

valeam persolvere,
Da misello de peccatis

veram indulgentiam.
Poenitenti, Christe, da veniam.
23. Zelo tuo pectus meum

fac ardere jugiter,
Ne flamma gehennae meam

unquam urat animam.
Miserere mei, piissime.

24. Luctuosum scripsi rhythmum
quaerelumque fletibus,
Quo finito mecum omnes

clament quoque singuli:
Ab inferno, Christe, me libera.

II.

DE SANCTIS.