Continua : Talia fecisti, et ideo " memor esto itaque unde excideris, " id est, a qua gratia separatus sis : et tunc legitur in persona subditorum. Eccli. ii, 16 : Vae his qui dereliquerunt vias rectas, et diverterunt in vias pravas.

Vel sic in persona Episcopi: " Memor esto itaque unde excideris, " id est, a quo statu vel dignitate cecideris, id est, disposueris ad cadendum per modicam negligentiam. Non enim credendum est . quod ceciderit a gratia quem Beatus Joannes tantum commendavit, sed a quodam statu fervoris in quo prius fuerat.

Sed contra : " Unde excideris. " Interlinearis : " A consortio fidelium nullus sic cadit nisi peccando mortaliter: " ergo mortaliter peccavit.

Respondeo. " Unde excideris, " id est, exposueris te ad cadendum : nam veniale disponit ad mortale: sed sive hoc sit, sive non, memoria peccatorum praeteritorum multum valet ad resurgendum. Eccli. XI, 27 : In die nullorum, id est, in statu peccati, ne immemor sis bonorum, id est, gratiae et misericordiae Dei.

"Et age paenitentiam, " scilicet, vel pro eo quod me dereliquisti, vel de remissione tuae charitatis. Matth. III, 2: Paenitentiam agite, etc. Et dicit: " Age, " non tantum propone, non tantum suscipe, non tantum promitte, sed age: quia, Luc. iii, 8 : Facile fructus dignos paenitentiae.

" Et prima opera, " id est, primis similia, " fac, " scilicet ut recuperes gratiam primam. Quasi diceret: Ita vive ut prius. Et est hoc argumentum quod paenitentia restituit, et in tanta gratia resurgit a quanta cecidit.

" Sin autem, venio tibi, et movebo candelabrum tuum de loco suo, nisi paenitentiam egeris. "

Hic ponit comminationes.