Quaestio III.

Cur Fratres ad officia praedicationis et confessionis tam iuvenes et immaturos promoveant.

Cum in praedicatione et confessione audienda multa sit discretio necessaria et peritia Scripturarum, quare ad haec officia tam iuvenes, ut videtur, et immaturos promovetis, qui et sibi et aliis aliquando minus prosunt et fortasse etiam obsunt, cum in clericis aliis hoc reprehendere soleatis animarum rectoribus?

Respondeo. Licet aliquando iunior litteratior sit et magis discretus quam senior, et facies iuvenilis saepius maiorem celet aetatem, et morum maturitas aetatis defectum suppleat: in plerisque tamen etiam propter hoc aliquoties ad haec officia promovemus iuniores, ut interim discant per exercitium, quia, cum vident se ad haec officia assumtos, diligentius student, qui alias forte segniores essent in studendo et minus proficerent. Minus etiam obest, si minus adhuc perfecti sunt promoti , dum vivunt adhuc seniores, qui eos possunt informare et corrigere et defectus illorum in consiliis supplere, quam si illi deficerent penitus, et nemo eos tunc sciret instruere, si tunc primo exercitari deberent. Tot etiam sunt requirentes a nobis praedicationes et confessiones et consilia, quod seniores non sufficiunt omnibus satisfacere. Ideo oportet, nos de iunioribus aliquos, qui sperantur idonei, promovere, qui onus seniorum sublevent et petentibus satisfaciant, prout sciunt. Quamvis autem nullum scienter promoveamus, quem non speremus idoneum, tamen aliquando aliquis praeter voluntatem nostram minus efficitur utilis, quia multa sunt, quae ad idoneitatem tanti officii requiruntur, et satis est difficile, haec omnia simul in omnibus reperiri.