Continua: Quae dicta sunt adversum te vera sunt: sed tamen ne desperes : " hoc habes " bonum," quia odisti facta Nicolaitarum. " Nota: Ut dicit Augustinus in libro de Haeresibus, iste Nicolaus fertur unus de septem diaconibus qui ab Apostolis sunt ordinati . Sed caeteris permanentibus, ille recessit de eorum societate, et doctrina, et fide : qui cum culparetur quod nimium zelaret uxorem suam pulcherrimam, ut se excusaret ab hac suspicione, respondit: " Non est mihi curae quid faciat, qui vult utatur ea : " unde et transiit in communem usum, quod factum multi imitati sunt. Et, ut dicitur, propter hoc praedicavit uxores communicandas, et omnes mulieres, et hunc mundum non factum a Deo esse, sed a quibusdam principibus factum, et quod erat licitum comedere de idolothytis.

" Quae et ego odi, " scilicet facta eorum. Quasi dicat : Vitia odisti, non naturam : quae ego odi, sed diligo naturam.

Nota : Nicolaus qui interpretatur populus stultus, significat Gentiles qui in Christum veram sapientiam credere noluerunt. I ad Corinth. I, 23: Praedicamus Christum crucifixum, Judaeis quidem, etc. Item, haereticos et Judaeos de quibus Psalmista, Psal. xciii, 8 : Intelligite insipientes in populo. Item, avaros qui in terrenis ponunt amorem suum. Luc. xii, 16 : Hominis cujusdam divitis uberes fructus ager attulit, etc.

" Qui habet aurem, audiat quid Spiritus dicat Ecclesiis: Vincenti dabo edere de ligno vitae, quod est in paradiso Dei mei. "

Supra posuit Epistolae exordium et narrationem, hic ponit conclusionem, in qua omnes generaliter invitat ad perseverantiam.

Et dicuntur duo. Primo, invitamur ad audiendum. Secundo, ponitur ipsius Spiritus dictum: " Vincenti dabo. "