Sermo XI .

Item, sermo Bonaventurae editas Parisius coram Fratribus in Capitulo de mane et post prandium explanatus coram rege et familia.

Pax Dei, quae exsuperat omnem sensum, custodiat corda vestra et i ntelligentias vestras i n Christo Iesu, ad Philippenses quarto .

In verbis his Apostolus, Spiritu sancto inspiratus et animarum zelo accensus, optat fidelibus et omnibus salvari in Christo volentibus condescendentiam divinae benevolentiae sive protectionis supernae. Circa quae tria facit. Primo enim, ut ad cognitionem illuminet, ostendit, in Deo esse imperturbabilis pietatis fontalitatem, cum dicit: Pax Dei, id est Deus, qui est pax essentialiter intransitive; secundo, ut ad devotionem inflammet, ostendit, in eo esse inexterminabilis suavitatis felicitatem, cum addit: quae exsuperat omnem sensum, id est, transcendit et excedit omnem intellectum angelicum et humanum; tertio ut suam affectionem insinuet, implorat filiis gratiae fidei et caritatis perseverantiam et indefectibilitatem, cum subdit: custodiat corda vestra, in vera caritate, et intelligentias vestras, in vera fide.

I. Nota ergo, quod Deus aeternus dicitur pax, quia ipse est pacis inspirator, dator et auctor; Isaiae vigesimo sexto: Domine, dabis pacem nobis, omnia enim opera nostra operatus es nobis.

Pacis immissor, fautor et amator; Lucae decimo: Si ibi fuerit filius pacis, requiescet super illum pax vestra; sin autem, ad vos revertetur; ad Colossenses tertio: Pax Christi exsultet in cordibus vestris.

Pacis conservator, reformator et promotor; primae ad Corinthios decimo quarto : Non enim est dissensionis Deus, sed pacis, sicut et in omnibus Ecclesiis Sanctorum doceo.

Pacis

commendator, remunerator et praemiator; Matthaei quinto : Beati pacifici, quoniam filii Dei vocabuntur.

II. Optat autem Apostolus hanc pacem fidelibus tanto studio et tanto zelo, quia ipsa est origo omnium gratiarum; Psalmus: Factus est in pace locus eius et habitatio eius in Sion.

Radix omnium meritorum ; Iacobi tertio : Fructus autem iustitiae in pace seminatur facientibus pacem.

Plenitudo omnium iucunditatum; ad Romanos decimo quarto : Non est regnum Dei esca et potus, sed iustitia et pax et gaudium in Spiritu sancto.

Possessio omnium virtutum et omnium interiorum potentiarum et desideriorum Ioannis decimo quarto : Pacem relinquo vobis, pacem meam do vobis. Non turbetur cor vestrum neque formidet; et Ioannis decimo sexto: In mundo pressuram habebitis, in mel autem pacem.

Si autem velimus exponere, pax Dei, id est pax Christi, est " benignitas scilicet eius pacifica ", secundum Dionysium de Divinis Nominibus, "secundum quam discimus non ultra pugnare neque cum nobis ipsis neque ad invicem "; qui etiam dicitur pax, quia unitivus omnium et suavificativus et quietativus et terminativus desideriorum; ac propter hoc eam transcendere omnem sensum, satis possumus et vere dicere. Tunc enim in sacri hominis mente est pax ipsa Dei et Christi, quando mens ex nimio motu amoris in Deum pacificatur, nihil quaerens extra illum. Unde Augustinus : " Quando aliquid aeternum mente capimus, quantum possumus, non in hoc mundo sumus ". " Quia anima verius est ubi amat, quam ubi animat ". Per quem modum et secundum quem dicitur pax huiusmodi transcendere omnem sensum, id est intellectum et affectum Angelorum et hominum.