Acta Apostolicae Sedis - Commentarium Officiale882

gessit Dei Servus: cum in Ecclesia, ad quam rem sacram facturus accesserat,

D.N. Crucifixi imaginem deiectam atque ab haereticis deformatam invenisset

(quae insuper sibi splendoribus circumfusa visa est), restaurandam curavit,

secumque una deferens, magno semper in honore habuit, ac moriens Cardinali

Moscoso Archiepiscopo Toletano legavit. Quocirca Matritum reducem variis

honorum ac munerum titulis eumdem Rex Catholicus honestavit, in quibus

Servus Dei sese sanctissime gessit.

Sed quo tempore nitidius virtutum omnium habitus, quas sibi iam com-

paraverat Ven. Ioannes, illuxerint, facili negotio ex insequentibus ad mortem

usque annis demonstratur. Nam a providentissimo Rege Philippo IV, qui

fessis iam inclinatisque Mexicanis rebus opem ferre animo statuerat, pro

Sacerdotio Angelopolitano praesentatus, licet Servi Dei humilitas reluctaret,

vicit tandem Regis ipsius hortatio, consiliumque Confessarii sui, qui D. Tho-

mae a Villanova nepos erat, et anno 1639 rite quoad omnia consecratus

in Episcopum Angelopolitanum, XI Kal. Augusti insequentis anni 1640

Angelopolim ingressus est.

Referenda hic esset cura pastoralis vigilantissima, qua in fide, in doctrina

sana, in caritate non ficta, verbo, scripto, exemplo, visitatione dioecesium,

laboribus, aliisque zeli ferventissimi argumentis, magnisque factis, America-

nas et Hispanas oves a Domino sibi creditas aluit, rexitque; referenda eximia

prudentia, qua Ducem de Escalona a Pro-Regis munere amovit, qua Iudicem

Residentiae trium Pro-Regum, qua Visitatorem Generalem, ac Generalem

Ducem egit.

Postquam dioecesim Angelopolitanam per novem annos praesens rexerat,

Matritum a Rege vocatus, eam per vicarios et pastorales litteras diligenter

gubernare curavit, usque dum, mense Martio 1654, ad Sedem Oxomensem

translatus est. Tandem, postquam novam dioecesim sibi commissam, per

quinquennium sanctissime rexerat, die prima octobris anni 1659, fidelis

servus et prudens, in gaudium Domini Sui vocatus est.

Fama sanctitatis, qua Servus Dei in vita per plures annos gavisus fuerat,

adeo post eius mortem crevit, ut Episcopus Oxomensis anno iam 1666

Processum Informativum pro eius Canonizatione inchoare decreverit. Post

longum iter, tandem ex norma disceptatum est an Servus Dei heroum in

modum virtutes observavisset. Felici cum eventu, die 4 Aprilis anno 2008

actus est Congressus Peculiaris Consultorum Theologorum, et die 2 subse-

quentis mensis Decembris, Sessio Ordinaria est habita Patrum Cardinalium

et Episcoporum, Causae Ponente Em.mo D.no Card. Iuliano Herranz.