48. De Conceptione BMV.

Ad Vesperas.

1. Fulget dies specialis,

Regia concipitur
Christi parens virginalis,

Per haec mors deprimitur
Culpae cunctis generalis,

Hac homo reficitur.
2. Ut testatur Isaias

Virga Jesse pullulat,
Haec, ut refert Jeremias,

Virga florem bajulat,
Per quam vide prophetias,

Homo vetus exsulat.
3. Haec est, cujus in conclave

Carne juncto numine
Caro verbum tam suave

Fit non viri semine,
Et ex Eva format Ave

Evae verso nomine.

4. Judaea gens erubescit
Discors et incredula,
Quod spiritu requiescit
Sanctus in puellula,
Nec confessus, quod nitescit
Sol de carnis nebula.
5. Ut infractum perforatur
Radio vas vitreum,
Nec in partu reseratur
Conclave virgineum,
Dolet daemon, depraedatur
Et chaos tartareum.

6. Haec est nostra mediatrix,
Via deviantibus,
Reparatrix, advocatrix,

Portus naufragantibus,
Theophili consolatrix,
Vitae datrix omnibus.

7. Sit laus summae trinitati,

Matri jubilatio,
Quae det, nos ut denudati

A carnali pallio
Conregnemus laureati

Coelesti palatio.