50. De sancta Iuliana.

In 1. Vesperis.

Antiphonae.

1. Plaudat mater ecclesia

Novis laudum praeconiis,

Quam Iulianae gloria

Festivis replet gaudiis.

2. Haec nata de nobilium

Praefectorum progenie

Patris, matris, insignium

Civium Nicomediae.

3. Ab annis puerilibus

Sacris imbuta moribus,

Sponsum Christum praeelegit,

Cui totam se subiecit.

4. Sprevit omnem viri thorum

Hostis manens vitiorum,

Conservare volens statum

Virginalem illibatum,

R. Trahentes ad interitum,

Igni martyr proicitur,

Sed gaudens tradit spiritum,

Dum caput ense caeditur.

V. Honor, virtus et gloria

Sit Christo, sponso virginum,

Qui nos ad caeli gaudia

Ducat post vitae terminum.

Ad Magnificat.

A. Ad honorem Iulianae,

Contemptricis pompae sanae,

Persolvamus laudis melos

Hac qua die scandit caelos

In vestitu speciosa

Solis more luminosa,

Sponso Iesu praesentata

Sit pro nobis advocata.

Ad Matutinum.

Invitatorum.

Regem regum adoremus,

Voce, votis honoremus,

Qui Iulianam hodie

Heredem fecit gloriae.

In 1. Nocturno.

Antiphonae.

1. Admirabilis, Domine,

Comprobans in virgine,

Humanas quae blanditias

Sprevit atque delicias.

2. Caeli narrabant gloriam

Perpetuam se quaerere,

Non mundi transitoriam,

Quae noscitur deficere.

3. Haec est generatio

Quaerentium Dominum,

Perseverans natio

Sacratarum virginum.

4. In virginis labiis

Est gratia diffusa,

Nam caesa suppliciis

Stabat inconfusa.

5. Deus noster refugium

Fuit Iulianae,

Patris nequam consilium

Paciens iuane.

6. Dominum mirabilem

Virgo laniata

Fatetur laudabilem

Caelo iam beata.

Responsoria.

1. Iuliana nobilis

A patre flagellatur,

Ut immolet daemonibus,

Minime mutatur,

Vacat dei laudibus,

V. Christum Dei filium

Vocat in auxilium

Exposita verberibus.

2. Caesa datur Iuliana

Praefecto, quam puniat

Iudicis officio;

Movet iudex verba vana,

Ut eam emolliat

Carnali contagio ;

V. Immortali servo quidem,

Inquit, soli puram fidem,

Nulli iam consentio.

3. In furore iudex motus,

Mente caeca captus totus

Virginem exspoliari,

Quatuor iubet mactari,

Ministrorum manibus.

V. In tormentis vultu laeta

Domini stabat athleta

Nullis laesa caedibus.

4. Praefectus coepit fremere

Se volens interimere

Caecus iracundia,

Mandans statim viris illis

Nudam appendi capillis

Die fere media.

V. Dura quassata procella

Cuncta tolerat puella

Mira patientia.

In 2. Nocturno.

Antiphonae.

1. Fundamenta posuit

Sancta sanctis montibus,

Oleum haec habuit

Intrans cum prudentibus.

2. Cantate regi virginum,

Omnis terra, canticum,

Haec sancta propter Dominum

Carnis vitavit lubricum.

3. Dominus sapientia

Triumphum dedit virgini

De mundi malitia

Sanctorum iungens agmini.

4. Cantate mirabilia,

Quae Dominus ostendit,

Dum cuncta visibilia

Martyr haec vilipendit.

5. Dominus glorificavit

In aeterno solio

Virginem, quae triumphavit

Perpesso supplicio.

Responsoria.

1. Tyrannus magis saeviens

Illatis nil proficiens

Tormentis [crudelius],

Ollam plumbi bullientis

Super caput patientis

Fundi iubebat saepius,

V. Poenam libenter patiens,

Pro Christo mori cupiens

Nil reputabat carius.

2. Religata post catenis

Reservanda novis poenis

[Iuliana] ergastulo

Datur adminiculo

Sublato ministrantis ;

V. Non defuit solacio

Divina miseratio

Angeli consolantis.

3. Nocte Satan veniens,

Angelum se mentiens

Bonum, dicit talia:

Cur tam dura pateris?

Tuis membris teneris

Sunt haec nimis gravia.

V. Christo placent minime

Nec tuae prosunt aniraae

Perpessa supplicia.

4. Dubitavit primitus,

Sed docetur caelitus

Capere daemonium;

Interrogat, quid ageret?

Quod homines deciperet,

Hoc suum officium.

V. Amat fraudes, odia,

Quaelibet convicia

Nutrit cum discordia.

In 3. Nocturno.

Ad Cantica.

A. Quasi rosa vel Ulium

Plantata secus fluvium

Fructus fecit honestatis

Viam servans puritatis.

Responsoria.

1. Educta de carcere

Summe verberatum

Trahit Dei munere

Daemonem ligatum,

In lutum proiciens;

V. Vade, inquit, in infernum,

Christianos in aeternum

Sinas, leo rugiens.

2. Praeceptoris imperio

Rota grandis erigitur,

In ipsa dum extenditur

Carnificum officio

Tota conquassatur ;

V. Angelus statim adfuit,

Rotam illam comminuit,

Mox virgo liberatur.

3. Numero quingenti viri

Signo viso tanti miri

Se fecerant baptizari,

Qui sunt iussi decollari;

V. Centum triginta feminae

Confidentes in virgine

Viris petunt sociari.

4. Iuliana ad praemium

Virgo praesentata

Capite minuitur.

Corpus terrae linquitur,

Anima secura

Intrat caeli gaudium ;

V. Christo mente semper iuncta

Vita vivit vita functa.

In Laudibus.

Super Psalmos.

A. Dominus fortitudinem

Iulianae tribuit,

Quando nullam gravedinem

Tormentorum timuit.

Ad Benedictus.

A. Flos Iuliana virginum,

Ora pro nobis Dominum,

Pro nobis, virgo Christi,

Ut mundi post exsilium

Intremus caeli gaudium,

Martyr, quod meruisti.

Per Horas.

Ad Primam.

A. Haec est virgo sapiens

De numero prudentum,

Devote custodiens

Virgineum talentum.

Ad Tertiam.

A. Ista virgo sapiens

Inventa margarita,

Mundana despiciens

Comparavit ita.

Ad Sextam.

A. Benedixit creatorem

Suis [in] operibus,

Virginalem servans florem,

Datum caeli civibus.

Ad Nonam.

A. Duo minuta protulit,

Quod est quadrans, obtulit,

Corpus tormentis tradidit,

Animam caelo reddidit.

In 2. Vesperis.

Ad Magnificat.

A. Glorificat miraculis

Iulianam divinitas,

In qua divinis oculis

Mira fulsit fidelitas,

Quam gratiarum titulis

Sollemnem fecit populis

Virginalis integritas.