Congregatio de Causis Sanctorum 771

ACTA CONGREGATIONUM

CONGREGATIO DE CAUSIS SANCTORUM

BARCINONENSIS

Beatificationis et Canonizationis Servae Dei Mariae Teresiae Albarracı́n (in

saeculo: Mariae de Monte Carmelo), ex Instituto Religiosarum a Maria Immacu-

lata Missionariarum Claretianarum (1927-1946)

DECRETUM SUPER VIRTUTIBUS

« Ut gaudium meum in vobis sit, et gaudium vestrum impleatur [...] et

gaudium vestrum nemo tollit a vobis » (Io 15, 11; 16, 22).

De gaudio illo Beatus Ioannes evangelista hic alloquitur, quod fructus est

communionis cum Christo eiusdemque mandatis fidelitatis: non autem de

inani delectatione, quae a mundo fluit, sed de vero Spiritui Sancto docilitatis

signo (Gal 5, 22).

Altioris huius laetitiae e mysterio paschali manantis virtus Servae Dei

Mariae Teresiae Albarracı́n vitae singulari ratione personat, cuius in hoc

mundo perbrevis peregrinationis nota insignis fuit illud proximo quoque

iugiter arridere, quod ex sapientia paternae Dei dilectionis oritur sicut

ex certitudine quod « diligentibus Deum omnia cooperantur in bonum »

(Rom 8, 28).

Venerabilis Serva Dei in vico Portu Mazarronio prope Murciam in

Hispania die 1 mensis Maii anno 1927 nata est, sexta ex novem filiis

Francisci Albarracı́n et Mariae ab Angelis Pascual. Decem diebus post ad

baptismalem fontem paroeciae Sancti Ioseph ducta Mariae de Monte

Carmelo nomen sumpsit. Familia eius, christiana pietate summopere

informata, amore Dei et Ecclesiae per vitam fide inflammatam eam aluit.