364 Acta Apostolicae Sedis - Commentarium Officiale

134. Haec omnia in itinere quodam efficiuntur perpetui incrementi. Haec

tam peculiaris forma amoris quae matrimonium constituit ad constantem

vocatur maturationem, quia ad illam semper est accommodandum quod

sanctus Thomas Aquinas de caritate dicebat: « Ipsa enim caritas secundum

rationem propriae speciei terminum augmenti non habet, est enim partici-

patio quaedam infinitae caritatis, quae est Spiritus Sanctus […]. Similiter

etiam ex parte subiecti terminus huic augmento praefigi non potest, quia

semper, caritate excrescente, superexcrescit habilitas ad ulterius augmen-

tum ».135 Sanctus Paulus vehementer hortabatur: « Vos autem Dominus abun-

dare et superabundare faciat caritate in invicem et in omnes » ( 1Thess 3, 12);

et addidit: « De caritate autem fraternitatis […] rogamus autem vos, fratres,

ut abundetis magis » ( 1Thess 4, 9-10). Magis etiam. Caritas matrimonialis

non custoditur ante omnia de indissolubilitate loquendo sicut de quodam

officio, vel aliquam doctrinam repetendo, sed eam roborando constantis

ope augmenti, gratia suffragante. Caritas quae non crescit in discrimine

incipit versari, et crescere possumus tantummodo divinae gratiae pluri-

mis actibus amoris fideles, actibus affectus frequentioribus, intentioribus,

benignioribus, tenerioribus, laetitioribus. Maritus et uxor « sensum suae

unitatis experiuntur, quam plenius in dies adipiscuntur ».136 Donum amoris

divini quod in sponsos effunditur eos eadem opera convocat ad hoc gratiae

donum usque augendum.

135. Minime iuvant quaedam dulcis et perfecti amoris species, orbati hoc

modo quovis stimulo adolescendi. Notio aetheria amoris terrestris obliviscitur

melius esse illud nondum attactum, vinum progrediente tempore maturatum.

Sicut Episcopi Chiliae memoraverunt, « non sunt familiae perfectae quas

nobis pervulgatio commendaticia fallax et rerum consumendarum immode-

ratio proponunt. In eis anni non transeunt, morbi, dolor, mors absunt [...].

Pervulgatio commendaticia rerum immodice consumendarum mendacium est

quod longe abest a rebus, quibus singulis diebus occurrere debent patres ac

matresfamilias ».137 Magis proficit revera limites accipere, provocationes et

imperfectiones, nec non efficere ut una progrediendi incitamentum excipiatur,

amor curetur et vinculi firmitas colatur, quibuscumque in casibus.

135 Summa Theologiae II-II, q. 24, art. 7. 136 conc. oEcum. Vat. ii, Const. past. Gaudium et spes, 48. 137 confErEntia EpiScopaliS cHiliaE, La vida y la familia: regalos de Dios para cada uno de

nosotros (21 Iulii 2014), n. 3.